Drejtoresha e Qendrës Spitalore “Nënë Tereza”, Anxhela Paparizo, gjatë një konference për shtyp me ministren e Shëndetësisë, Evis Sala, nuk ka dijeni se në QSUT mjekët marrin lekë nga pacientët.
E pyetur për fenomenin e marrjes së parave nga pacientët në spitale, Paparizo u shpreh se nuk ka dijeni për raste të tilla dhe se nuk ka pasur denoncime.
“Nuk kam njohuri për marrje lekësh dhe nuk kemi denoncim për këto raste.” tha ajo.
Ndërsa drejtoresha po përpiqej t’i përgjigjej pyetjes, në krah të saj u dëgjua edhe ndërhyrja e këshilltares së ministrisë, Albana Qehajaj, e cila i sugjeroi: “Vazhdo për kardiologjinë, mos iu përgjigj.” Moment që nuk i shpëtoi vëmendjes, duke krijuar një situatë ironike në një konferencë ku pritej më shumë transparencë për shqetësimet e pacientëve.
Deklarata për “mosdijeninë” mbi fenomenin e pagesave nën dorë, një problem i përfolur prej vitesh në sistemin shëndetësor, u shoqërua kështu edhe me një kujtesë nga krahu i djathtë për të qëndruar tek tema e kardiologjisë. Mes premtimeve për godinën e re dhe mungesës së denoncimeve zyrtare, duket se diskutimi për paratë e pacientëve mbeti sërish jashtë “diagnostikimit” publik.
