Tirana dhe Partizani do të përballen të dielën në or 16:30 në “Air Albania”, në derbin e tretë të këtij sezoni, i cili është i 181-ti në historinë mes dy klubeve.
Kjo ndeshje i gjen skuadrat në situata krejtësisht të ndryshme, me “Demat” që pozicionohen në vendin e pestë dhe bardheblutë të tetët.
Diferenca mes ekipeve është 9 pikë. Tirana nuk fiton në derbi prej 7 dhjetorit 2025. Në 12 ndeshjet e fundit të luajtura, janë koleksionuar 2 fitore të Tiranës, 4 barazime dhe 6 fitore të Partizanit.
BILANCI – 180 takime janë luajtur deri tani mes Partizanit dhe Tiranës në periudhën 1947- 2026 në të gjitha kompeticionet. Partizani ka fituar 74 ndeshje, ndërsa bardheblutë 49. 57 ndeshje të tjera janë mbyllur në barazim.
GOLAVARAZHI – 239 gola ka shënuar Partizani, ndërsa Tirana 195. Golat e fundit në derbi për Partizanin janë shënuar nga Hjumën dhe Skuka, por në dhjetor. Në anën tjetër në derbin e fundit të fituar nga Tirana shënonin Falaje, Patstasia me penallti dhe Tabeku. Ndeshja e 3 tetorit 2025 përfundoi me shifrat 3-0 për Tiranën.
HISTORIA – Takimi i parë historik mes Tiranës dhe Partizanit është luajtur më 30 mars 1947. “Demat e Kuq” fituan 8-0, duke sigluar kështu edhe fitoren më të thellë deri më tani në derbi. 38 vite më vonë, më 22 shtator 1985, Tirana do t’i kthente reston Partizanit, duke e mundur 7-3, në një ndeshje që mbahet mend nga tifozët e të dyja skuadrave për lojën e bukur dhe batutën për “ndryshimin” e orarit të punës. Rezultati më i thellë i sezoneve të fundit është ai 28 shkurtit të vitit 2020, kur bardheblutë fitonin me shifrat 5-1.
Ndërsa më 1 mars 2008, kur të kuqtë drejtoheshin nga Hasan Lika, fitonin në “Qemal Stafa” me shifrat 4-1. Interesant është fakti se nga viti 2006 deri në 2025, janë luajtur 54 ndeshje për llogari të Superiores dhe Partizani ka fituar 23 prej tyre. Në barazim kanë përfunduar 21 ndeshje, ndërsa 10 herë ka triumfuar Tirana. Dukshëm “Demat” kanë dominuar kryeqytetin. “ISH”-ët – Portieri i Partizanit, Pano Qirko, ka një të shkuar me klubin bardheblu. Sa i përket Tiranës, duke qenë se janë riformatuar si skuadër në sezonin e fundit, asnjë nga lojtarët aktualë nuk regjistron një të shkuar si profesionist me Partizanin./Panoramasport
