Banorët e fshatit Luz në Fushë-Krujë kanë dalë sot në protestë për gjendjen e rënduar të rrugës që kalon në zonën e tyre.
Rruga është shndërruar në një problem serioz për komunitetin ku trotuaret janë të mbuluara me baltë, duke rrezikuar kalimtarët, ndërsa fasadat e shtëpive janë dëmtuar nga ndotja masive.
Sipas banorëve, mjetet e vogla përfundojnë shpesh në servise për shkak të dëmtimeve të shkaktuara nga rruga, ndërsa makinat e tonazhit të rëndë e përdorin segmentin gjatë natës, duke e rënduar edhe më shumë situatën.
Protestës iu bashkua edhe Aulon Kalaja, i cili e cilësoi gjendjen e rrugës si “gjendje lufte”.
“Protesta e tyre është drejtë. Rruga është në gjendje lufte. Në trotuare mund të thyesh qafën nga lluci. Bizneset e kësaj rruge në faliment, se të gjithë e shmangin rrugën. Banorët që kanë shtëpitë aty përveçse i janë dëmtuar fasadat nga balta, por jetojnë në ndotje masive.
Mjetet e vogla përfundojnë në servise në mënyrë sistematike. Makinat e tonazhit të rëndë po ashtu. Këta të fundit po përdorin rrugën e Fushë Krujës për kalim, natën.
Nuk bëhet fjalë për rrugë fshati, por për unazën e Fushë-Krujës dhe rrugën ku kalojnë kamionët e fabrikave të çimentos dhe jo vetëm. Rreth 100 mijë banorë janë konsumatorë të këtij segmenti. Banorët duan zgjidhje. Kujdes, jo me çakull, por me asfalt në përputhje me punimet që bëhen në vendet e Bashkimit Europian”, theksoi Kalaja.
