Kosova shënon sot 27-vjetorin e Masakrës së Reçakut, një nga krimet më të rënda dhe më tronditëse të kryera gjatë luftës, ku më 15 janar 1999 u vranë mizorisht 45 civilë shqiptarë të paarmatosur nga forcat policore, ushtarake dhe paramilitare serbe, që vepronin nën regjimin e Sllobodan Millosheviçit.
Reçaku mbetet simbol i dhimbjes, sakrificës dhe vuajtjes së një populli që u përball me dhunë çnjerëzore vetëm pse kërkonte të jetonte i lirë në tokën e vet. Me rastin e këtij përvjetori, nën patronatin e kryeministrit të Republikës së Kosovës, Albin Kurti, po organizohen aktivitetet përkujtimore tradicionale “Ditët e Reçakut”, në nderim të martirëve dhe për të mos lejuar që e vërteta të harrohet.
Sot, në të gjithë Republikën e Kosovës, ora e parë mësimore do t’i kushtohet Masakrës së Reçakut, si një mësim historie, dhimbjeje dhe ndërgjegjeje kombëtare për brezat e rinj. Në orën 08:30 do të zhvillohen homazhe në Kompleksin Memorial të Reçakut dhe në varrezat e dëshmorëve në Shtime. Krerët e shtetit do të bëjnë homazhe në orën 10:00, ndërsa në orën 11:00 do të mbahet Akademia përkujtimore.
Mëngjesi i 15 janarit 1999 e gjeti Reçakun të rrethuar. Sipas dëshmive, rreth orës 06:30 fshati u bombardua me artileri të rëndë. Pas kësaj, forcat serbe hynë në fshat, duke kryer bastisje dhe ekzekutime të civilëve të pafajshëm. Pamjet dhe dëshmitë nga Reçaku tronditën botën dhe zbuluan fytyrën e vërtetë të dhunës sistematike që po ushtrohej ndaj shqiptarëve të Kosovës.
Reçaku nuk është vetëm një fshat. Është një thirrje për drejtësi, një kujtesë se liria e Kosovës është ndërtuar mbi gjakun e civilëve të pafajshëm dhe një obligim moral që e vërteta të mos shtrembërohet kurrë. Populli i Kosovës përkulet me nderim para martirëve dhe vazhdon rrugën e tij me dinjitet, duke mos harruar, por duke kërkuar drejtësi.
