Drejtoria e Përgjithshme e Burgjeve ka urdhëruar një kontroll urgjent në qelinë e të burgosurit Fatmir Pjetri, i cili vuan dënimin në burgun e Burrelit.
Pjetri, i njohur si pjesë e grupit kriminal të ashtuquajtur “Babagjyshët”, është vënë në qendër të vëmendjes pas publikimit në profilin e tij në Instagram të një audioregjistrimi, ku ai akuzon Drejtorinë e Burgjeve se nuk e ka lejuar të botojë një roman të shkruar prej tij, me arsyetimin se përmban akte dhune.
Pas këtij publikimi, autoritetet penitenciare kanë nisur verifikimet për të zbuluar si është realizuar regjistrimi audio dhe në çfarë mënyre është shpërndarë nga brenda institucionit të vuajtjes së dënimit, duke ngritur dyshime për përdorim të mjeteve të palejuara të komunikimit.
Sipas burimeve zyrtare, kontrolli në qelinë e Pjetrit synon të evidentojë shkelje të rregullave të sigurisë, si dhe përgjegjësit e mundshëm për lejimin e këtij rasti.
Ngjarja shihet me shqetësim nga autoritetet, pasi në vitin 2025 Fatmir Pjetri ka tentuar të arratisej nga burgu 313, çka e bën situatën aktuale edhe më të ndjeshme.
Fatmir Pjetri ka qenë pjesë e grupit kriminal “Babagjyshët”, i cili gjatë periudhës janar–dhjetor 2013 dhe në vijim, ka kryer grabitje me armë në disa qytete të vendit, përfshirë Tiranën, Laçin, Fushë-Krujën, Kuçovën dhe Durrësin.
Grabitja që bëri më shumë bujë ishte ajo në një qendër tregtare në Tiranë, ku anëtarët e grupit, të maskuar si babagjyshë, realizuan vjedhjen e disa argjendarive, duke tronditur opinionin publik në atë kohë.
