Prurjet e mëdha të lumenjve Fan i Vogël dhe Zmeja po shkaktojnë dëme të vazhdueshme në territorin e Mirditës, ndërsa rrezikojnë seriozisht tokat bujqësore dhe infrastrukturën jetike të zonës.
Lumi Fan i Vogël ka marrë sipërfaqe të konsiderueshme toke bujqësore dhe i është afruar rrugës kryesore, duke krijuar frikë për shembje të mëtejshme.
Në disa segmente, rrjedha e ujit ka devijuar dhe, dy ditë më parë, shkaktoi dëmtimin e linjës elektrike, e cila më pas është zëvendësuar.
Problematike paraqitet edhe situata te lumi Zmeja, ku gërryerja ka ekspozuar tubacionin kryesor të ujësjellësit.
Pjesë të tubit kanë mbetur të varura në ajër, duke rrezikuar furnizimin me ujë të pijshëm në rast se struktura dëmtohet nga rrjedha e mëtejshme.
