Situata në territorin e Bashkisë Shkodër paraqitet e qëndrueshme, me nivele të ujit nën kuotat kritike dhe pa problematika të reja të evidentuara. Kjo bëhet e ditur nga monitorimi periodik në terren i kryer ditën e sotme, më 10.01.2021, në orën 08:00.
Sa i përket situatës së lumenjve, nivelet e ujit në Bunë dhe Drin mbeten të kontrolluara dhe brenda parametrave të sigurisë. Megjithatë, gjatë 24 orëve të fundit është regjistruar një rritje prej rreth 10–20 cm krahasuar me një ditë më parë. Në Urën e Vjetër të Bunës, niveli i ujit shënon 8.30 metra, ndërsa në Urën e Bahçallëkut, lumi Drin paraqitet në kuotën 8.05 metra. Në njësinë administrative Dajç, niveli i ujit është 6.48 metra.
Në territorin e Bashkisë Shkodër, sipërfaqja totale e përmbytur vlerësohet rreth 266 hektarë. Nuk raportohet asnjë banesë e përmbytur apo me prezencë uji.
Në njësinë administrative Ana Malit, vijon të jetë e bllokuar rruga për në Obot për mjetet e ulëta, ndërsa rruga mbetet e kalueshme vetëm për mjetet e larta, pasi niveli i ujit mbi rrugë arrin mbi 50 cm. Sipërfaqja e tokës bujqësore e përmbytur në këtë njësi vlerësohet rreth 130 hektarë, kryesisht në fshatrat Obot dhe Muriqan.
Në njësinë administrative Dajç, sipërfaqja e tokës bujqësore e përmbytur vlerësohet rreth 35 hektarë, kryesisht në zonën e Pentarit.
Ndërsa në njësinë administrative Velipojë, sipërfaqja e tokës bujqësore e përmbytur vlerësohet rreth 101 hektarë.
Bashkia Shkodër vijon të jetë në monitorim të vazhdueshëm të situatës, ndërkohë që konstatohet një tendencë e tërheqjes së ujit nga zonat ku ka ende prezencë të tij. Strukturat vendore mbeten në gatishmëri për përballimin e çdo situate të mundshme.
