Policia turke ka përdorur pompa uji dhe gaz lotësjellës për të shpërndarë protestuesit në Stamboll, kundër arrestimit të liderëve të partisë HDP pro-kurde.
Protestuesit u mblodhën jashtë një xhamie në lagjen Sisli, duke ngritur parrulla kundër atij që e quajtën “shtet fashist”.
Nëntë eksponentë të HDP-së, përfshirë bashkëkryetarët, u arrestuan dhe u burgosën ditën e premte. Gazetarë nga gazeta pro-opozitës “Cumhuriyet” ndodhen gjithashtu në qeli.
Gazeta në fjalë është një nga të paktat media turke që vazhdojnë të jenë kritike ndaj Erdogan. Bëhet fjalë për lëvizjet e fundit kundër kritikëve të presidentit Erdogan që nga grushti i dështuar i shtetit i organizuar në korrik.
Pas 9 anëtarëve të partisë kurde të arrestuar të premten, 9 të tjerë iu shtuan listës këtë të shtunë.
