Administrata e Donald Trump ka miratuar shitjen e armëve me vlerë 11 miliardë dollarë për Tajvanin. Kjo paketë, e cila ende duhet të miratohet nga Kongresi i SHBA-së, do të jetë shitja e dytë e armëve për Tajvanin që kur presidenti Donald Trump u kthye në Shtëpinë e Bardhë në muajin janar.
Shitja e fundit e armëve ka zemëruar Pekinin, i cili vitet e fundit ka rritur presionin mbi Tajvanin me stërvitje ushtarake dhe ndërhyrje të rregullta në ujërat dhe hapësirën e tij ajrore. Kina, e cila e sheh Tajvanin e vetëqeverisur si një provincë të shkëputur, tha se ky veprim “dëmton rëndë sovranitetin, sigurinë dhe integritetin territorial të Kinës”.
“Përpjekja e SHBA-së për të mbështetur pavarësinë me forcë vetëm sa do të ketë efekt të kundërt dhe përpjekja e saj për të frenuar Kinën duke përdorur Tajvanin nuk do të ketë absolutisht sukses. Kjo vetëm sa do të përshpejtojë shtytjen drejt një situate të rrezikshme dhe të dhunshme përgjatë Ngushticës së Tajvanit”, tha zëdhënësi i ministrisë së Jashtme kineze, Guo Jiakun.
Ministria e mbrojtjes e Tajvanit falënderoi SHBA-në dhe tha se marrëveshja do ta ndihmonte ishullin në “ndërtimin e shpejtë të aftësive të forta parandaluese”.
SHBA-të kanë lidhje zyrtare me Pekinin dhe jo me Tajvanin, dhe kanë ecur në një linjë të ngushtë diplomatike për dekada të tëra. Por ato mbeten një aleate e fuqishme e Tajvanit dhe furnizuesit më të madh të armëve të ishullit.
