Vijojnë reagimet pas kërkesës së SPAK drejtuar Kuvendit për heqjen e imunitetit për zv/kryeministren Belinda Balluku.
Tedi Blushi, Sekretar i Përgjithshëm i Partisë së Lirisë, i kërkon Kuvendit mbledhjen sa më parë të Këshillit për Rregulloren, Mandatet dhe Imunitetin dhe miratimin e autorizimit të Prokurorisë së Posaçme si pikë e parë e rendit të ditës të seancës plenare të datës 18 dhjetor (të enjten).
“Në zbatim të Rregullores së Kuvendit, neneve 13 dhe 118, në emër të Grupit Parlamentar të Partisë së Lirisë, kërkoj mbledhjen sa më parë të Këshillit për Rregulloren, Mandatet dhe Imunitetin për miratimin e kërkesës për dhënien e autorizimit nga Kuvendi për arrestimin e Zv/Kryeministres, Belinda Balluku.
Miratimi i autorizimit të vendoset si pikë e parë e rendit të ditës të seancës plenare të datës 18 dhjetor.
Vjedhja e taksave të shqiptarëve nuk mund të ketë më asnjë sekondë më shumë imunitet politik dhe Kuvendi nuk mund të shndërrohet kurrë në mburojë të korrupsionit skizofrenik të Edi Ramës dhe bashkëpunëtorëve të afërt të tij”, shprehet Blushi.
