Me urdhër të SPAK (Struktura e Posaçme AntiKorrupsion), agjentët e BKH-së (Byroja Kombëtare e Hetimit) kanë zbarkuar mëngjesin e sotëm, 16 dhjetor, në zonën e Kodrës së Diellit dhe janë lëshuar disa urdhër-arreste për zyrtarë e biznesmenë, për abuzim me tenderat e AKSHI-t.
Në lidhje me këtë lajm, ka reaguar në deklaratë për mediat, edhe kryetari i Partisë Demokratike, Sali Berisha.
Ai tha se AKSHI është një institucion, që ka një histori si në Holliwood. Berisha tregoi sesi në këtë institucion, është marrë peng një ish-zyrtar që dinte për atë që ndodhte aty. Për Berishën, ka pasur urdhër, që zyrtari i marrë peng Daniel Shima të vritej, por urdhri është ndryshuar dhe ai është dhunuar në mënyrë brutale.
“Grupi i AKSHI-t janë organizatë kriminale. Njëri nga të përfshirët u mor peng dhe tani ndodhet në Gjermani e ka rrëfyer gjithçka. U mor peng dhe ish-zv drejtori i AKSH-it, Daniel Shima. Zv drejtori thirret një ditë dhe i thuhet se je shkarkuar nga detyra.
E morën peng, sepse e akuzuan si spiun. Një ditë në mes të Tiranës, persona të veshur policë, e rrethojnë dhe ish-zv drejtori e kupton se çfarë fati do ketë. I çon mesazh nënës apo partneres se nuk e mbaj mend mirë, se po e marrin peng persona me uniforma policie.
E futën në Qytetin Studenti, e kthyen dhe e dërguan në bodrumet e Suel Çelës. Urdhri ishte ta groposnin. Por urdhri ndryshoi, kur e morën vesh se e ka dërguar mesazh tek të afërmit dhe historia tashmë ishte marrë vesh. Por në këtë moment, e torturuan, ia thyen kockat. Ish-zv ministri i AKSHI-t nuk dihet a është gjallë apo jo. Këtu ndodhin çudira. Dy biznesmenët, për të cilat janë lëshuar masa sigurie sot nga SPAK për tenderat tek AKSHI, janë në Dubai. Këto janë rreth i rrezikshëm. Këta bashkëpunonin edhe me bandat”, tha Berisha.
