Kreu i “Shqipëria Bëhet”, Adriatik Lapaj, vijon të protestojë me mbështetësit e tij përpara godinës së kryeministrisë ndërsa mbrëmjen e kësaj të enjteje nuk i ka kursyer akuzat ndaj ish-aleatit të tij, Endrit Shabani.
Adriatik Lapaj e ka quajtur Shabanin shërbëtor të Edi Ramës ndërsa theksoi se në Parlament po luhet një akt i turpshëm pasi po garantohet që të shpërblehet tradhtari i kauzës.
“Personalisht për mua është një ditë krenarie e madhe, pse do të thoni ju? Sepse tërë këto muaj, më është dashur që të mbaj mbi supe tradhtinë e një njeriu 5 lekësh, që sot po dëshmohet në Parlament se ishte shërbëtor i Edi Ramës. Sot në Parlament po luhet një akt i turpshëm, po garantohet që të shpërblehet tradhtari i kauzës, i cili ka qenë në në fillim me atë qëllim”, tha Lapaj.
Kujtojmë se Adriatik Lapaj dhe mbështetësit e tij u përplasën dy netë më parë me policinë pasi në trotuar vendosën çadra kampingu për shkak të temperaturave të ulëta. Që prej 8 dhjetorit Lapajt i janë bashkuar një numër i vogël personash, kryesisht simpatizantë dhe anëtarë të partisë së tij.
Adriatik Lapaj ka artikuluar në çdo dalje të tij publike që në nisje të kësaj proteste se nuk do të tërhiqen pa dhënë dorëheqjen kryeministri Edi Rama. Gjithashtu Lapaj ka theksuar se nëse kjo nuk do të funksionojë, do të largohen nga protesta deri në momentin që s’do e përballojnë dot më.
Ndërkohë poshtë zyrës së Ramës proteston çdo të hënë dhe Sali Berisha ndërsa opozitari tjetër Arlind Qori ka zgjedhur Kuvendin si pikën kryesore për të shpalosur pakënaqësitë e tij.
gijotina.com/
