Në mbledhjen e sotme në Komisionit të Ligjeve u diskutua procedura e aplikimit për vendin vakant për anëtar të Gjykatës Kushtetuese, për shkak të mbarimit të mandatit të ish gjyqtares Elsa Toska.
Me tetë vota pro u miratua shpallja e vakancës për anëtarin e Gjykatës Kushtetuese, të cilin i takon Kuvendit ta zgjedhë. Ky anëtar do të ketë mandat të plotë 9-vjeçar në ushtrimin e detyrës.
Ulsi Manja, i cili drejton Komisionin e Ligjeve deklaroi se që nga momenti i publikimit në faqen e Kuvendit kandidatët që aplikojnë kushtet dhe kriteret kanë afat 20 ditë për të aplikuar për këtë vend vakant.
Ky zhvillim ndodh pas ngërçit të krijuar një vit më parë, kur procesi për zëvendësimin e Toskës u pezullua për shkak të padive të depozituara në Gjykatën Kushtetuese.
Kuvendi synonte të zgjidhte një gjyqtar me mandat të plotë, ndërsa më pas Kushtetuesja vendosi se edhe Toska, njësoj si Holta Zaçaj dhe Sonila Bejtja, duhej të konsiderohej me mandat të pjesshëm, për të ruajtur ritmin kushtetues të rinovimit periodik të trupës (tre anëtarë çdo tre vjet).
