Bashkia Tiranë ka zyrën më të madhe të marrëdhënieve me publikun nga të gjitha institucionet. Kjo zyrë prodhon foto dhe video të kryetarit në aksion, në mbjellje pemësh, fillim punimesh, inaugurime, takime, sidomos përdoren fëmijët për të kuruar imazhin e tij. Erion Veliaj nuk pranon të fotografohet apo filmohet nga gazetarët, ai i përgatit vetë reportazhet dhe kronikat.
Për këtë duhen mjete. Vazhdimisht blihen aparatura për profesionistët e manipulimit të opinionit. Këtë radhë ka vendosur të blejë dy aparate fotografik profesional. Këtë e morëm vesh nga Agjencia e Prokurimeve Publike e cila e njoftoi tenderin më datë 17 tetor 2024, me objekt ‘Blerje aparat fotografik profesional’. “Gara” ka qëndruar hapur deri më 29 tetor 2024, kur është mbajtur edhe tenderi. Këto aparate duhet të kenë cilësi të larta që ta nxjerrin Veliajn si top model.
Zyra e Veliajt nuk është lodhur për të shpallur fituesin, pasi nuk ka ndjekur procedurat ligjore për zhvillimin e prokurimit.
Është dorëzuar vetëm një ofertë nga firma “QuantX IT Solutions” shpk, prandaj procedura duhej anuluar për mungesë konkurrence.
Pa nevojë konkurrence, pa marrë mundimin të shqyrtojë dokumentet e ofertës së dorëzuar, duke cenuar rregullat kryesore të Prokurimeve Publike, komisioni i Veliajt ia dhuroi këtë tender kompanisë “QuantX IT Solutions” shpk, duke firmosur në fund kontratën 13 milionë lekëshe.
Na duket shumë shtrenjtë ky çmim sepse në treg aparatet fotografik të markave më të mira botërore, Canon apo Nikon me të dhënat që kërkon Bashkia Tiranë, i gjen nga 1 deri 5 mijë mijë euro, madje edhe më lirë. Sa për informacion, gjetëm online disa tipe për t’ia sugjeruar Lali Erit, që janë në pamjet më poshtë:
Më datë 14 nëntor 2024, komisioni i Veliaj ka bërë publike kontratën përfundimtare me fitues “QuantX IT Solutions” shpk, ku shënohet ndër të tjera, se “nuk ka operator të skualifikuar”.
Open Data Albania e ka vlerësuar tenderin me “Flamur të kuq”, që është shenja e riskut të korrupsionit.
Qindra milionë lekë për propagandën
Ju duket një thërrime ky tender, por bashkia shpërdoron shumë para për sende të tilla, për paga dhe zyra që helmojnë opinionin publik.
Mediat transmetojnë të pandryshuara lajmet e gatshme të përgatitura nga “redaksia” prej dhjetëra punonjësish në Bashkinë e Tiranës.
Kreu i Bashkisë së Tiranës nuk ka zhvilluar asnjë konferencë për shtyp me gazetarët, ai pranon të fotografohet vetëm nga njerëzit e tij me këto aparate profesionale që blen me tender.
Bashkia e Tiranës ka një influencë të madhe në redaksitë e mediave kombëtare e lokale të cilat publikojnë pa asnjë filtër informacionet e dërguara nga zyra e PR-it, duke lejuar bombardimin me propagandë politike të opinionit publik.
Drejtoria e Përgjithshme e Komunikimit dhe Marrëdhënieve me Publikun ka në varësi të saj 3 drejtori të tjera të ndara në 6 sektorë të ndryshëm. Më specikisht, drejtoria e përgjithshme ndahet në Drejtorinë e Informacionit, Drejtorinë e Komunikimit me Qytetarët si dhe Drejtorinë e Protokollit dhe Marrëdhënieve me Jashtë. Së bashku me drejtorin e përgjithshëm, këto tre drejtori kanë afro 50 punonjës, ku përfshihen 3 drejtorë, 5 përgjegjës sektori dhe 34 specialistë.
Këto drejtori, me punonjësit dhe mjetet teknike dhe financiare të vendosura në funksion të tyre, administrojnë prezencën në media dhe rrjete sociale të kryetarit te bashkisë së Tiranës. Përveç këtij grupi drejtorësh dhe specialistësh, kryetari i Bashkisë Erion Veliaj ka edhe këshilltarë për median në kabinetin e tij. 216 mijë euro në vit i kushton taksapaguesve shqiptarë vetëm flota e këshilltarëve të Erion Veliajt.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
