Ka përfunduar takimi i presidentit Bajram Begaj me kryetarët e partive të vogla parlamentare, Partisë Republikane, Fatmir Mediu, të PBDNJ-së Vangjel Dule, të LZHK-së, Dashamir Shehi dhe të PAA, Agron Duka, për caktimin e datës së zgjedhjeve parlamentare të vitit 2025.
Mësohet se krerët e partive të vogla kanë propozuar 4 Majin si datë të zgjedhjeve, pasi në 9 Maj mbahet takimi i Komunitetit Politik Europian.
Ndërkohë, kryetari i Partisë Agrare Ambientaliste, Agron Duka në një prononcim për mediat deklaroi se është normale që presidenti të nisë konsultimet me partitë politike, pasi e përcakton qartë edhe Kushtetuta.
“Ne propozuam datën 4. Kushtetuta e përcakton 15 prill-15 maj. Më e arsyeshme për ne është maji, por duke qenë se përfiltet që me datë 19 ka një aktivitet me pjesëmarrje të kryeministreve të Europës kjo mund të ndikojë në zgjedhje dhe mendoj se data 11 është e papërshtatshme. Besoj do të takojë edhe të tjerët presidenti, por në fund të fundit ata që do vendosin dihet se kush janë.
Ne kemi dhënë mendimin tonë. Kushtetuta përcakton 4 të diela, data 1 është e përcaktuar në kushtetutë dhe diskutohet patjetër. Por për shkak se paragjykohet për atë që u thashë, mund të ndikojë edhe në zgjedhje, se i bie të mbyllë fushatën me datë 9 të mbledhë të Europës, të flasë si do ai dhe kjo nuk është normale sipas mendimit tim.
Kjo është logjike, ne jemi në opozitë. Ju a mendoni kështu si unë, ka efekt nëse këtu ka një efekt kaq madhor? Po. Edhe PD të njëjtin qëndrim do mbajë”, tha Duka.
Në deklaratat publike, Partia Demokratike nuk ka shprehur ndonjë datë të preferuar se kur mund të mbahen zgjedhjet, ndërsa kreu i saj, Sali Berisha ka deklaruar se zgjedhjet të mbahen sa më shpejt të jetë e mundur.
