Dosja hetimore në ngarkim të ish-deputetit të PS Jurgis Çyrbja sjell një tjetër provë sesi krimi i organizuar është përdorur nga socialistët në zgjedhje.
Sipas hetimeve të Prokurorisë së Posaçme, Çyrbja, duke shfrytëzuar funksionin e tij si deputet, i ka ofruar favorizime të ndryshme të hetuarit tjetër të këtij procedimi penal – Altin Hajri, i shpallur në kërkim ndërkombëtar – duke ndërhyrë në agjenci të ndryshme të zbatimit të ligjit në Shqipëri. Qëllimi, sipas hetuesve, ishte favorizimi i tij apo të lidhjeve të ngushta familjare e shoqërore të Hajrit. Mes të tjerash, Çyrbja e ka furnizuar Altin Hajrin edhe me informacione të konsideruara “sekret”, përmes së cilave i kërkuari i ka shpëtuar aksioneve policore për kapjen e tij. Herë e njoftonte drejtpërdrejtë dhe herë përmes ndërmjetësit Ahmet Masha.
Nga ana tjetër, thotë akuza, Hajri, në këmbim të këtyre favoreve të siguruara nga deputeti, i ofronte këtij të fundit që të votonte si dhe të siguronte votues në funksion të mbështetjes së tij si kandidat për deputet në Qarkun e Durrësit, në zgjedhjet parlamentare të vitit 2021.
Në një njoftim zyrtar, prokuroria thotë se Çyrbja ka furnizuar me informacione sekrete edhe persona të tjerë të shpallur në kërkim policor.
Akuzat
Prokuroria e Posaçme njoftoi këtë të hënë se mbi bazën e referimit të bërë më datë 15.10.2024 nga Hetuesit e Byrosë Kombëtare të Hetimit, në të njëjtën datë, ka proceduar me ndarjen e akteve të procedimit penal Nr. 93 të vitit 2023 dhe regjistrimin e procedimit penal Nr. 93/1 të vitit 2024, si dhe vijimin e hetimeve për konsumimin e elementëve të veprave penale të mëposhtme:
- “Zbulimi i akteve ose të dhënave sekrete”, kryer më tepër se një herë, parashikuar nga neni 295/a/1 i Kodit Penal, pa autor.
- “Tregimi i sekretit shtetëror nga shtetasit” kryer nga shtetasi Jyrgis Çyrbja më tepër se një herë, parashikuar nga neni 295/1 i Kodit Penal.
- “Përkrahja e autorit të krimit”, kryer nga shtetasi Jyrgis Çyrbja, më tepër se një herë, parashikuar nga nenet 302/1/2 të Kodit Penal. “Tregimi i sekretit shtetëror nga shtetasit”, kryer në bashkëpunim nga shtetasit Jyrgis Çyrbja dhe Ahmet Masha, parashikuar nga nenet 295/1 dhe 25 të Kodit Penal.
- “Përkrahja e autorit të krimit”, kryer në bashkëpunim nga shtetasit Jyrgis Çyrbja dhe Ahmet Masha, parashikuar nga nenet 302/1 dhe 25 të Kodit Penal.
- “Korrupsioni aktiv në zgjedhje”, kryer nga shtetasi Jyrgis Çyrbja, parashikuar nga neni 328 i Kodit Penal.
- “Korrupsioni pasiv në zgjedhje”, kryer nga shtetasi Altin Hajri, parashikuar nga neni 328/b i Kodit Penal.
Hetimet për rastin janë kryer në bashkëpunim me Europol, Eurojust dhe autoritetet franceze të drejtësisë, saktëson SPAK, ndërsa si prova janë marrë edhe përgjimet e aplikacionit “SKYECC”.
“Këto hetime janë realizuar në bashkëpunim të ngushtë me autoritetet evropiane të drejtësisë dhe Byronë Kombëtare të Hetimit. Për interesa të këtij procedimi penal, ndër provat e tjera, janë administruar edhe aktet e dërguara nga autoritetet franceze të drejtësisë, në kuadër të ndihmës së ndërsjelltë juridike në fushën penale dhe ka rezultuar se personat e përfshirë në këtë aktivitet të paligjshëm kriminal kanë komunikuar ndërmjet tyre edhe me anë të aplikacionit të enkriptuar “SKYECC”, thuhet në njoftimin e Prokurorisë.
Hetimet
Sipas SPAK: Nga analiza e akteve të administruara deri në këto momente, ekzistojnë dyshime të arsyeshme të bazuara në prova se, funksionarë publik (të paidentifikuar deri në këtë fazë të hetimit), në kundërshtim me përmbushjen e rregullt të detyrës në 7(shtatë) raste, kanë zbuluar akte të cilat ligji i përcakton si sekret shtetëror, pasi me përmbajtjen e tyre rezulton se është vënë në dijeni personi nën hetim Jurgis Çyrbja, duke konsumuar elementët e veprës penale “Zbulimi i akteve ose të dhënave sekrete”.
Nga hetimet e kryera, ka rezultuar se aktet sekrete me anën e të cilave është vënë në dijeni personi nën hetim Jurgis Çyrbja, konfirmonin faktin se bashkëbiseduesit e aplikacionit të enkriptuar “Sky ECC” ishin persona të shpallur në kërkim ndërkombëtar dhe ky informacion rreth përmbajtjes së dokumenteve dhe akteve që sipas ligjit përbëjnë sekret shtetëror, i është transmetuar pikërisht personave të shpallur në kërkim.
Gjithashtu, personi nën hetim Jurgis Çyrbja, është vënë në dijeni edhe të disa planeve operacionale të Policisë së Shtetit, lidhur me kontrollet që do zhvilloheshin në zonën e Durrësit, me qëllim për të kapur personat e shpallur në kërkim dhe ky informacion rreth përmbajtjes së dokumenteve dhe akteve që sipas ligjit përbëjnë sekret shtetëror u është transmetuar personave të shpallur në kërkim, si drejtëpërdrejtë prej tij, ashtu edhe përmes angazhimit të personit tjetër nën hetim Ahmet Masha, me qëllim për të mundësuar njoftimi i personave të shpallur në kërkim, duke konsumuar elementët e veprës penale “Tregimi i sekretit shtetëror nga shtetasit”.
Informacionin që personat nën hetim Jurgis Çyrbja dhe Altin Masha u kanë transmetuar personave të shpallur në kërkim ndërkombëtar ka shërbyer si një e dhënë e rëndësishme që këta persona të qëndronin të fshehur me qëllim që t’i shpëtonin kapjes apo arrestimit të mundshëm nga strukturat e Policisë së Shtetit, duke konsumuar elementët e veprës penale “Përkrahja e autorit të krimit”, kryer në bashkëpunim.
Po ashtu, nga hetimi i këtij procedimi penal ka rezultuar se Çyrbja, në kohën e kryerjes së veprave penale ka qenë deputet i Kuvendit të Shqipërisë, i cili ka patur një marrëdhënie miqësore me personin tjetër nën hetim Altin Hajri, i shpallur në kërkim ndërkombëtar për kryerjen e veprave shumë të rënda penale. Çyrbja, për shkak të funksionit të tij si deputet i ka ofruar favorizime të ndryshme të hetuarit të shpallur në kërkim ndërkombëtar, Altin Hajri, duke ndërhyrë në agjenci të ndryshme të zbatimit të ligjit në Shqipëri, me qëllim favorizimin e tij apo të lidhjeve të ngushta familjare e shoqërore, duke konsumuar elementët e veprës penale “Korrupsioni aktiv në zgjedhje”.
Nga ana tjetër, Hajri, në këmbim të këtyre favoreve të siguruara nga Çyrbja, i ofronte këtij të fundit që të votonte si dhe të siguronte votues në funksion të mbështetjes së tij si kandidat për deputet në Qarkun e Durrësit, në zgjedhjet parlamentare të vitit 2021, duke konsumuar elementët e veprës penale “Korrupsioni pasiv në zgjedhje”.
Çyrbja dhe Masha të arrestuar, Altin Hajri ende në kërkim
Prokuroria e Posaçme saktëson se ka kërkuar në Gjykatën e Posaçme të Shkallës së Parë për Korrupsionin dhe Krimin e Organizuar, caktimin e masës të sigurimit personal për 3 persona në hetim dhe gjykata me vendimin e saj datë 20.10.2024 ka vendosur pranimin e kërkesës: caktimin e masës të sigurimit personal me karakter shtrëngues “arrest në burg”.
Ky vendim është vënë në ekzekutim nga ana e Prokurorisë së Posaçme po më datë 20.10.2024, dhe ka angazhuar strukturat e Drejtorisë së Përgjithshme të Policisë së Shtetit, ku të njëjtën ditë, është bërë e mundur prej tyre që të ekzekutohen masat e sigurimi personal vetëm për dy personat nën hetim Çyrbja dhe Masha.
Por, ende nuk është bërë e mundur ekzekutimi i masës së sigurimit personal të caktuar nga gjykata ndaj personit tjetër nën hetim Altin Hajri, i cili ka qenë i shpallur person në kërkim që në muajin Janar të vitit 2020, në kuadër të procedimit penal me Nr. 62, të vitit 2020, të Prokurorisë së Posaçme, për kryerjen e veprave “Rrëmbimi ose mbajtja peng e personit” e kryer në bashkëpunim, “Trafikim i narkotikëve”, “Mbajtja pa leje dhe prodhimi i armëve, armëve shpërthyese dhe i municionit”, “Fshehja dhe asgjësimi i kufomës”. Akuzat lidhjen me çështjen penale për zhdukjen dhe rrëmbimin e Jan Prengës, i cili besohet se është vrarë.
Prokuroria shton se ka kërkuar në GJKKO edhe kryerjen e disa kontrolleve, kërkesa të cilat janë miratuar nga ana e gjykatës, dhe nga policia gjyqësore janë ekzekutuar 3 vendimet e gjykatës, si dhe janë realizuar kontrolle banesash, automjetesh, dhe personash.
Pas kontrolleve të ushtruara, janë sekuestruar sendet e mëposhtme:
- Pesë telefona celularë;
- Një hard disk i jashtëm Verbatim;
- Një pajisje regjistrimi në formë pakete;
- Shuma monetare prej 1,100 (njëmijë e njëqind) euro;
- Dokumente pronësie, etj;
“Hetimet vazhdojnë me administrimin e provave sa i përket implikimit të personave të tjerë që dyshohet se janë të përfshirë në këtë veprimtari të paligjshme kriminale”, thotë prokuroria.
