Për 300 nxënësit e shkollës “Met Hasa” në Durrës procesi mësimor këtë vit do të kthehet në një rrëmujë. Kjo për faktin se kryebashkiakja Emiriana Sako, gjatë pushimeve të verës merrej me pazaret e tenderit të riparimit të godinës. Tani që ka nisur viti mësimor, kryetarja u kujtua të firmosë kontratën dhe të ndërhyjë me punime.
Në një dokument të regjistruar në APP tregohet se Bashkia Durrës ka përfunduar tenderin me objekt ‘Ndërtim shkolla 9-vjeçare “Met Hasa”’. Kjo është një shkollë ekzistuese, është shkolla në foto, që aktualisht mësojnë 300 nxënës, prej vitesh në kushte të vështira pasi nuk është vënë dorë. Megjithatë objekti i prokurimit nuk mund të jetë ndërtim, por rikonstruksion apo riparim.
Sipas projektit të bashkisë, kësaj shkolle do t’i shtohen edhe dy godina të tilla që bashkohen në formë rrethi. Pra, shkolla do të jetë e mbyllur, do të krijohet edhe një ambient i hapur në mes, që do të shërbejë për komunitetin pasditeve.
Gjithsesi sipas fotove, do të shtohen korridoret lidhëse edhe disa klasa që do të shërbejnë si laboratorë, por klasat për zhvillim mësimi do të jenë sërish në kapacitetin për 300 nxënës.
Dhe për ndërtimin e këtyre godinave, komisioni i Sakos ka llogaritur se duhet të shpenzohen 2.4 milionë euro. Duket një shifër e madhe për këtë punë, por jemi mësuar tashmë me metodën e “përllogaritjes” që përdorin komisionet për fondin limit.
Ndërkohë ju kujtojmë këtu që me fondet e tërmetit të dhëna dhe kontrolluara nga donatorët me kaq para ndërtoheshin nga fillimi dy shkolla.
Nëse do të shohim ofertat e kompanive pjesëmarrëse, ato fillojnë nga 177.777.777 lekë, pra afro 600 milionë lekë më pak se sa fondi limit. Duket se llogaritë e Sakos janë pak të trasha dhe nuk afrohen me tregun.
Theksojmë kontrata parashikohet të arrijë më shumë se sa 2.4 milionë euro, sepse në këtë shifër nuk është përfshirë TVSH-ja.
Ndërkohë, mësojmë se Sako e ka firmosur këtë prokurim në shkelje të kërkesave të ligjit. Open Data Albania i ka vendos tenderit ‘Flamurin e Kuq’, që është shenja e riskut të korrupsionit.
Gjatë periudhës që ishte e hapur gara u dorëzuan 11 oferta, mjaftueshëm për një konkurrencë të fortë!
Epo, Sako nuk e ka pasur më plan që t’i shqyrtojë.
Prandaj 10 kompani janë skualifikuar nga gara me argumente se kanë mungese dokumentacionesh të ndryshme. Mes të shkualifikuarve kishte edhe oferta shumë më të lira. Konkretisht S I R E T A 2F shpk, B93 II + GRAMA + NGRACAN + B-93, DION-AL shpk, HTM shpk + BE – IS shpk, dhe bashkimi i operatorëve C O L O M B O + BAJRAMI N kishin oferta që nisnin nga 1.7 milionë euro deri në 1.8 milionë euro. Një diferencë goxha e madhe me fondin limit, por ato janë mënjanuar pasi nuk kanë paraqitur punë të ngjashme të kryer më parë.
Duket e pabesueshme që këto kompani të mëdha të mos e kenë këtë eksperiencë!
Në këtë mënyrë, mbeti e vetme mbi tavolinën e komisionit vetëm oferta e paraqitur nga bashkimi i operatorëve ASI-2A CO + SHENDELLI me vlerë 1.9 milionë euro. Kjo është një diferencë me të paktën 200 milionë lekë më shumë se ofertat e tjera. Gjithsesi, është e dukshme që Sako i kishte paracaktuar si fitues. Kështu kontrata u firmos me pronarët Astrit Gjikondaj dhe Yzedin Bozhaj.
Gijotina.com së fundmi ka denoncuar disa tenderë pa garë që përfitojnë këta biznesmenë, duke vënë re se ata veprojnë së bashku për të përfituar tenderë me vlera të larta dhe kontratat afatgjate. Vetëm pak ditë më parë ata fituan 500 milionë lekë për të riparuar një rrugë në Peqin. Kështu po i shtojnë dita -ditës dhuratat që marrin nga kryebashkiakët, që bëjnë tendera fiktivë.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
