Për partinë e Shpëtim Idrizit, që ka në themel mbrojtjen e çështjes çame, diplomacia qeveritare nuk është e vetmja mënyrë për të ngritur zërin. Shpëtim Idrizi ka menduar të përfshijë edhe Parlamentin.
“Kemi ndërmarr një hap parlamentar për krijimin e një komisioni të posaçëm për zbardhjen e çështjes çame, pra faktmbledhës me dokumente, historianë dëshmi, për të zbardhur nga pikëpamja historike dokumentare të gjithë çështjen e shqiptarëve të Çamërisë”, tha Idrizi.
Ngritja e komisionit synon t’i shërbejë nxjerrjes së një dokumenti pas dy ekzistuesve për çështjen çame.
“Akti i tretë dhe në kontekstin në të cilin po zhvillohen ngjarjet sot, pasi Brukseli stimulon që të dy qeveritë të flasin dhe të dialogojnë dhe për zgjidhjen e çështjes çame është i nevojshëm dhe për të shprehur vullnetin politik të gjithë forcave shqiptare që dhe Parlamenti të përfshihet në këtë çështje”, thotë Idrizi.
Paralelisht me këtë, çamët nuk heqin dorë nga kërkesa për reciprocitet në trajtimin e çështjes së respektimit të viktimave të Luftes së Dytë Botërore nga të dyja palët.
“Ne kërkojmë as më shumë e as më pak respektimin me dinjitet të shqiptarëve të Çamërisë. Nuk mund të jenë dot më më të rëndësishëm ushtarët grekë të rënë brenda territorit të Shqipërisë se sa shqiptarët e Çamërisë, partizanë, apo fëmijë, pleq, gra që janë masakruar pikërisht nga ai që Greqia i ka ngritur përmendore dhe na kërkon ne ta shohim këtë gjë ndryshe ”, tha ai.
