Kryeministri Edi Rama tha gjatë fjalës së tij në Kongresin e Partisë Socialiste se Shqipëria kaloi 3 furtuna: tërmetin, pandeminë dhe krizën e çmimeve, që erdhi fill pas fillimit të luftës në Ukrainë vetëm falë gatishmërisë së Partisë Socialiste.
Sipas tij, nëse këto ngjarje do të ndodhnin para 10 vitesh do ta gjenin vendin të papërgatitur dhe jo të gatshëm për të përballuar krizat.
“Pa asnjë ekzagjerim do të ishte e ngjashme me humnerën e vitit 1997, por fatmirësisht dhe vetëm, falë PS-së, të tre furtunat dërmuese na gjetën në këmbë dhe të gatshëm për të mbrojtur njerëzit e thjeshtë të këtij vendi me forcën dhe dinjitetin e një shteti që ende nuk ua plotëson dot shumë gjëra qytetarëve të tij, por ama nuk i lë vetëm kurrë në momentet e vështirësive të mëdha”, u shpreh Rama.
Sipas tij, sot Shqipëria është një vend krejt tjetër dhe çmohet botërisht, si kurrë më parë, për përparimet e dukshme që ka bërë, pret thuajse 10 milionë turistë brenda këtij viti që po mbyllim, ka një monedhë kombëtare më të fortë se asnjëherë, ecën çdo ditë përpara në çdo drejtim dhe ulet në çdo tryezë të komunitetit ndërkombëtar, jo vetëm duke dhënë respekt, siç ka bërë gjithmonë, por dhe duke marrë të njëjtin respekt nga të gjithë, siç nuk ndodhte përpara se sa ne ta sillnim Shqipërinë në këtë formë dhe në këtë pozicion.
Lidhur me paralajmërimet e Greqisë për të vendosur veton për bllokimin e kësaj faze të negociatave me BE-në, Rama tha se absurditeti i Greqisë nuk do ta pengojë Shqipërinë në rrugëtimin europian.
Rama solli në vëmendje skepticizmin e shprehur vite më parë nga Gjermania, Holanda, Franca, ndërsa tha se sot kemi arsyen e mosarsyeses nga ana e Greqisë.
“Nuk duhet të humbasim busullën, nuk duhet të na prishet gjaku ne se Greqia mund të mbajë qëndrime absurde”, tha Rama.
Në vijim ai shtoi se në rast se Greqia do të vërë veton për Shqipërinë për rrugën e saj drejt Bashkimit Europian, nuk është një arsye se përse ai do duhet të mërzitet. Madje, ai thekson se do të kthehet nga Brukseli edhe më krenar dhe më i motivuar për të vazhduar përpara punën, përtej asaj që e konsideron absurditet në rast se do të ndodh.
“Në rast se kjo ndodh, nuk do kthehem nga Bruskeli i mërzitur, por më krenar për Shqipërinë edhe më i motivuar për të vazhduar bashkë punët e shtëpisë sonë, edhe më i bindur se një absurditet i tillë nuk do e vonojë asnjë ditë procesin e anëtarësimit në Bashkimin Europian, madje edhe i rivendosur për ta përshpejtuar këtë proces, për ta bërë gati Shqipërinë për BE edhe më parë se BE të jetë Shqipërinë”, tha Rama.
Ai u shpreh se nuk ndryshon qëndrim për çështjen Beleri, sepse është i sigurt që Shqipëria ka të drejtë.
“Unë nuk do të pranoj deri në 13 dhjetor se fqinjët tanë do t’i vënën tapën e vetos shishes së hapur me aq shumë përkushtim, punë e profesionalizëm, nga një skuadër prej më shumë se 1000 vetash. Në gjithë sistemin e shtetit tonë, që kanë përfaqësuar me dinjitet Shqipërinë në tryezat e dialogut, për skanimin e gjendjes së vendit dhe duke provuar me fakte gadishmërinë ë Shqipërisë për të vazhduar me dukje negociatat”, tha Rama.
The post Veto greke në BE, Rama: Nuk e prish gjakun me absurditetin… appeared first on 27.
