Ylli i muzikës, Shakira ka arritur një marrëveshje me prokurorët spanjollë për të zgjidhur çështjen e mashtrimit fiskal, pikërisht kur gjyqi i saj ishte gati të fillonte.
Këngëtarja ka paguar 6.5 milionë pound gjobë për t’i shpëtuar burgut, ku sipas prokurorëve mund të bënte 8-vjet burg dhe një gjobë prej 20.8 milionë pound nëse do të shpallej fajtore.
Shakira është përballur me akuza për mashtrim tatimor, me një shume prej 12.7 milionë pound nga gjykata e Barcelonës. Këngëtarja, e cila vazhdimisht ka mohuar se ka thyer ligjin, është shprehur se ky vendim ishte në interesin më të mirë të fëmijëve.
Në një deklaratë të gjatë, ajo tha se fëmijët e saj “nuk duan të shohin nënën e tyre të sakrifikojë mirëqenien e saj personale në këtë luftë”.
“Gjatë gjithë karrierës sime, gjithmonë jam përpjekur të bëj atë që është e drejtë dhe të jap një shembull pozitiv për të tjerët”, tha ajo.
“Fatkeqësisht, dhe pavarësisht këtyre përpjekjeve, autoritetet tatimore në Spanjë ndoqën një çështje kundër meje, ashtu siç kanë bërë kundër shumë sportistëve profesionistë dhe individëve të tjerë të profilit të lartë, duke harxhuar energjinë, kohën dhe qetësinë e atyre njerëzve për vite me radhë“.
“Ndërsa isha e vendosur të mbroja pafajësinë time në një gjyq që avokatët e mi ishin të bindur se do të kishin vendosur në favorin tim, unë kam marrë vendimin për ta zgjidhur përfundimisht këtë çështje me interesin më të mirë të fëmijëve të mi, të cilët nuk duan të shohin mamin që sakrifikon mirëqenien e saj personale në këtë luftë.”
Ajo shtoi gjithashtu se duhet të kalonte stresin e disa viteve të fundit dhe të fokusohet në gjërat që do, fëmijët e saj dhe të gjitha mundësitë në karrierën e saj.
