Kuqezinjtë e drejtuar nga braziliani Sylvinho kanë prerë tashmë biletën për të marrë pjesë në Euro2024 që do të zhvillohet në Gjermani. Me pikën e fituar në transfertë ndaj Moldavisë, Shqipëria siguroi kualifikimin, ndërsa në ndeshjen e fundit pret Ishujt Faroe në “Air Albania” ku tekniku brazilian mund të vendosë rekordin e pikëve të grumbulluara nga kombëtarja në ndeshjet e Grupit, duke arritur kuotën e 17 pikëve në rast fitoreje.
Kualifikimi i kombëtares në Euro 2024 është festuar nga mbarë shqiptarët, ndërsa braziliani, që deri në minutën e fundit të përballjes me Moldavinë, e fshihte entuziazmin, shpërtheu në festime, momente këto të fiksuara nga kamerat dhe fotot e shumta.
Një gëzim tërësisht i ligjshëm dhe i merituar për një trajner që mori drejtimin e kombëtares 9 muaj më parë duke premtuar kualifikimin për në Europian.
Sylvinho ka pranuar se rrugëtimi ka qenë një kënaqësi e madhe dhe nëpërmjet një postimi në Instagram, ka shprehur emocionet e tij pas arritjes së objektivit të premten në darkë me barazimin në Moldavi si dhe ka falënderuar të gjithë ata që e bënë të mundur.
Reagimi i Sylvinho
“Lumturi dhe krenari e madhe. Sigurimi i një vendi në EURO 2024 është padiskutim realizimi i ëndrrës së shumë njerëzve, ëndrrës së një Kombi. Pjesëmarrja në një moment të tillë gëzimi për popullin shqiptar është një burim i jashtëzakonshëm kënaqësie.
Faleminderit e mija shkojnë për shumë njerëz: për futbollistët, të cilët kuptuan dhe mbështetën idetë tona dhe gjithmonë luajtën me shpirt dhe zemër.
Për pjesëtarët e stafit teknik dhe administrativ, të cilët punuan intensivisht dhe u kujdesën për çdo detaj gjatë të gjithë këtij rrugëtimi.
Për drejtuesit dhe punonjësit e Federatës, që kanë bërë gjithçka që puna jonë të bëhej në perfeksion.
Për fansat, për mbështetjen e tyre jetike brenda dhe jashtë shtëpisë tonë.
Për familjen time, që janë baza e gjithçkaje që bëj dhe më japin mbështetje që të bëj punën time me dashuri dhe dedikim!
Për këdo që direkt apo indirekt ka qenë pjesë e kësaj historie të mrekullueshme.
Euro 2024 është këtu tani.
Forca Shqipëri
The post Shqipëria në Euro 2024, Sylvinho rrëfen emocionet: U realizua ëndrra e… appeared first on 27.
