Neritan Ceka, një prej politikanëve më të vjetër në 33 vitet e pluralizmit shqiptar, ka zbuluar një detaj mbi një bisedë që ka pasur me Sali Berishën disa vite më parë.
Ceka tha se gjatë një bisede që ka pasur vite më parë i ka sugjeruar që të largohet nga politika active.
“Isha në takim me të, ishte periudha kur PD kishte nisur ato aksionet me çadra, pastaj dogji mandatet e deputetëve. Erdhi biseda dhe i thashë: doktor tërhiqu, krijo një fondacion, vij edhe unë, i japim mësim këtyre të rinjve, sepse vendi i PD-së nuk është rruga, është Kuvendi”, tha Ceka.
Në emisionin “Zonë e Lirë”, Ceka tha se për këtë propozim nuk mori asnjë përgjigje.
Lidhur me akuzat ndaj Berishës, Ceka theksoi se me shpalljen “non grata” Berishën e futën në lojë, pastaj rrodhën si rrodhën ngjarjet dhe doktorit i hodhën dorezën e sfidës. “Me aq sa e njoh unë Berisha është njeri luftarak, unë jam paqësor. Berishës i dhanë tribunën, atë që donte”, tha Ceka.
Ai u shpreh se nuk besonte se në akuzat apo hetimin e Berishës nga SPAK të qëndronte Edi Rama. “Është një lojë e trashë, nuk e di se kush e ka nisur, por Rama është piktor, kjo është një lojë e trashë”, tha Ceka.
The post Ceka zbulon bisedën me Berishën: Ja çfarë i propozova, por… appeared first on 27.
