Prokuroria e Elbasanit ka çuar në gjykatë materialin hetimor, ndaj dy personave të arrestuar, Arben Spahiu dhe Arsen Preçit, të cilët dyshohet se kishin planifikuar një atentat ndaj biznesmenit Elton Kila. Spahiu dhe Preçi akuzohen për “Sigurim të kushteve dhe mjeteve për të kryer vrasje”, “Mbajtjes pa lejë të armëve të zjarrit” dhe “Falsifikim të dokumentave”.
Sipas gazetarit Elton Qyno, i cili shkruan për “OraNews” se për Spahiun dhe Preçin, kunatin dhe kushëririn e Alibej, prokurori Kreshnik Ajazi ka kërkuar masën e sigurisë “arrest me burg”. Në mbështetje të akuzës, Policia pretendon se brenda në makinën e vjedhur në Shkodër, e cila mendohet se do përdorej për atentatin, ku u gjetën tre armët dhe dy bidona me benzinë, është zbuluar dhe një kartë identiteti të kombësisë greke me emrin Konstandinos Lolos banues në Patra.
Por fotografia e kësaj karte, ishte pikërisht e Arben Spahiut, shtëpia e të cilit ndodhet vetëm 50 metra larg vendit ku u gjetën armët. Vetë Arben Spahiu, ka deklaruar në polici se gjithçka ka qënë një inskenim që grupet kriminale në Elbasan, e kanë kryer me qëllim dëmtimin e familjes së tij dhe kunatit, Erjon Alibej. Teksa ky i fundit ende ndodhet i arrestuar për shkak se akuzohet se ka kryer disa vrasje në Elbasan dhe jo vetëm, për të cilat ka kontraktuar të penduarin e drejtësisë, Nuredin Dumanin.
Sipas hetimeve, Arsen Preçi e Arben Spahiu prisnin mbërritjen e Kilës në Elbasan për ta sulmuar atë. Ky i fundit, ka qenë duke udhëtuar nga Tirana drejt Elbasanit ndërkohë që në automjet ndodhej bashkë me fëmijët dhe ndërhyrja e Policisë pak minuta para mbërritjes së tij në qytetin e lindjes, u ka shpëtuar jetën. Mjeti u gjet i parkuar në lagjen e Erion Alibejt, i cili ndodhet pas hekurave pasi akuzohet për organizimin e një sërë vrasjeve dhe fillimisht u aludua se mjeti ishte lënë nga armiqtë e Alibejt, por hetimet sollën të tjera zhvillime.
Vetë Preçi dhe Spahiu, sapo panë prezencën e forcave të policisë në zonë, u larguan duke lënë automjetin pranë stadiumit “Elbasan Arena”.
Kjo është hera e katërt që dështojnë atentate që kanë pasur për qëllim eliminimin e Elton Kilës. Shkak për eliminimin e tij mendohet të jetë një hakmarrje e lidhur me kunatin e Alibejt, Arben Spahiu. Ai është vëllai i Ardit Spahiut, i vrarë në Belgjikë dhe i Rigers Spahiut, i arrestuar në tetor të 2022 pasi u kap me një arsenal armësh. Tashmë pritet marrja në pyetje e të gjithë të përfshirëve në këtë ngjarje.
