Gara për Bashkinë e Tiranë pritet një betejë mes Erion Veliajt të PS dhe Belind Këlliçit nga PD dhe aleatët.
Megjithatë në lojë janë edhe kandidatë të partive apo koalicioneve të tjera më të vogla që mund të dëmtojnë më shumë opozitën nga pikëpamja elektorale.
Kandidatët
Këlliçi është zyrtarizuar si kandidati i koalicionit opozitar “Shtëpia e Lirisë” (PD + LSI dhe parti të tjera më të vogla) në primaret e zhvilluara në Dhjetor 2022.
Kryeministri Edi Rama deklaroi një ditë më parë se Partia Socialiste ende s’ka asnjë kandidat për lokalet e 14 Majit. Megjithatë, më herët, eksponentë të rëndësishëm në PS e kanë bërë fakt të kryer se Veliaj do të rikandidojë në Tiranë.
Nga ana tjetër, në garë për kryeqytetin ën pritet të jetë edhe Dashamir Shehi, si kandidat i një koalicioni të zyrtarizuar këtë të premte mes partisë së drejtuar prej tij – LZHK-së dhe Bindjes Demokratike të Astrit Patozit.
Përveç Shehit, një tjetër aleat që i ‘dha duart’ koalicionit më të madh opozitar është edhe Shpëtim Idrizi, lideri i PDIU-së. Kjo parti pritet që të ketë Lejla Përnaskën si kandidate për bashkinë më të madhe të vendit.
Endi Shabani nga Nisma Thurrje pritet po ashtu të jetë një tjetër emër në listën zgjedhore për Tiranën.
Nga ana tjetër, burime bëjnë me dije se në ‘lojë’ po planifikon të futet edhe Lulzim Basha, ndërsa kandidati që do ta përfaqësojë mund të jetë Bledi Sula.
Partitë e vogla synojnë votat opozitare
Fuqia elektorale e këtyre kandidatëve në krahasim me dy forcat politike kryesore, për një përballje direkte, shihet si e papërfillshme. Megjithatë, në një matematikë elektorale të përgjithshme, ndikimi mund të jetë i konsiderueshëm.
Nëse marrim si lakmues zgjedhjet parlamentare të 25 prillit 2021 (duke qenë se lokalet e fundit u bojkotuan nga opozita dhe ato të tetë viteve më parë janë një aktualitet politik i largët) votat e partive të vogla që nuk zgjodhën të bashkoheshin me koalicionin e drejtuar nga PD e Sali Berishës mund të jetë shumë të rëndësishme për opozitën, në garën përballë PS-së dhe Erion Veliajt, që kanë treguar se janë një makineri e mirëfilltë elektorale e tipit makiavelist, e aftë të përdorë edhe mënyra të shumëllojshme të paligjshme, për të arritur fitoren.
Fillimisht, vlen të sillet në vëmendje se qëndrimi i të gjitha këtyre partive të vogla është (ose të paktën shfaqet publikisht) kundër qeverisë dhe priren të marrin vota të qytetarëve të pakënaqur me pushtetin, pra vota opozitare.
Duke mos pasur një pol të unifikuar, vota opozitare shpërndahet dhe humbet eficencën për të formuar shumatoren e votave që do të sillte mundjen e mazhorancës dhe përmbysjen e pushtetit.
Disa shifra
Mbi 183 000 vota mori PS në zgjedhjet e 2021-it, ndërsa aleati i saj PSD (që de facto cilësohet si partia e Tom Doshit) arriti në mënyrë surprizuese të votohej 9 818 herë.
Nga kampi tjetër, aleanca e udhëhequr na PD mori rreth 136 800 vota, ndërsa LSI rreth 22 160.
Dashamir Shehi, që ishte pjesë e listës së koalicionit opozitar për Tiranën mori 5436 vota preferenciale.
Ndërsa deputetët e PDIU-së, Shpëtim Idrizi dhe Mesila Doda rreth 10 000 vota. Edhe ata si Shehi, ishin pjesë e së njëjtës listë.
13 498 vota preferenciale kishte Lulzim Basha.
2028 herë u votua Bindja Demokratike e Patozit, ndërsa Nisma Thurrje mori 3706 vota.
