Një familje siriane me shtatë anëtarë, duke përfshirë pesë fëmijë kanë humbur jetën pasi shtëpia e tyre u përfshi nga flakët. Pas tërmetit të fuqishëm ata u zhvendosën në Turqi por përfunduan tragjikisht pasi streha e tyre shpërtheu në flakë.
Agjencia shtetërore e Turqisë, Anadolu, raportoi duke cituar një deklaratë me shkrim nga Zyra e Kryeprokurorit Publik të Konias se shtëpia njëkatëshe, në të cilën jetonin 14 persona, mori flakë të premten. Shtatë persona të plagosur në incident po marrin trajtim.
Sipas bilancit të fundit, të publikuar nga burime mjekësore, viktimat e tërmetit me magnitudë 7.8 që goditi Turqinë dhe Sirinë më 6 shkurt, janë mbi 41 mijë. Në Turqi, të vdekurit e konfirmuar janë 38,044, ndërsa në Siri 3,688. Mbrëmjen e së enjtes një pasgoditje e fortë me magnitudë 5.2 goditi zonën mes Turqisë dhe Sirisë. Epiqendra ishte në Iskenderun, në jug të Turqisë. Në Aleppo, në veri të Sirisë, një tjetër ndërtesë u shemb, duke lënë më shumë viktima nën rrënoja. Rreth 4,734 pasgoditje janë regjistruar në vend në njëmbëdhjetë ditët e fundit, sipas Autoritetit të Menaxhimit të Fatkeqësive dhe Emergjencave të Turqisë (AFAD).
