Ministri i Mbrojtjes të Shqipërisë Niko Peleshi ka shpërndarë një mesazh nga Turqia të ekipit shqiptar që është dërguar për ndihmë nga tërmeti në shtetin turk.
Peleshi shprehet se skuadra shqiptare punon me sakrifica, duke gërmuar në gërmadha.
“Në ditën e parë të operacionit të kërkim-shpëtimit, skuadra jonë iu bashkua përpjekjeve ndërkombëtare në ndihmë të zonave të prekura nga tërmeti katastrofik në Turqi. Nxjerrja e trupave nga rrënojat dhe kërkimi për të mbijetuar është tani objektivi i të gjithë grupeve të shpëtimit. Skuadra jonë arriti të rikuperojë dy trupa dhe vazhdon kërkimet për të gjetur të mbijetuar”, u shpreh Peleshi.
Ndërsa, komandanti i grupit të shqiptarëve Behar Katuçi, në videon nga Turqia thotë se grupi ka kryer gërmime dhe se deri tani fatkeqësisht janë nxjerrë dy trupa pa jetë nga ana e tyre. Ai shpjegon se terreni është i vështirë dhe temperaturat janë të ulëta.
“Sot kemi operuar në disa zona operacionale ku fatkeqësisht kemi nxjerrë dy viktima. Temperaturat janë të ulëta. Ne presim detyrat e radhës”, tha Katuçi.
