Mbi 5 mijë të vdekur dhe mijëra të plagosur janë regjistruar deri më tani në Turqi dhe Siri pas tërmetit shkatërrimtar të mëngjesit të ditës së djeshme.
Numri i viktimave pritet të rritet në ditët në vijim, pasi shumë persona ndodhen ende nën rrënoja.
Sipas raportimeve mediatike, në mesin e mijëra njerëzve të vrarë nga tërmeti është edhe një politikan turk.
Bëhet fjalë për Yakup Tas, 63 vjeç, një anëtar i partisë në pushtet të presidentit Rexhep Tajip Erdogan, i cili u gjet mes rrënojave të shtëpisë së tij në qytetin Adiyaman.
“Agjencia Anadolu” njoftoi se bashkëshortja, vëllai, kunata dhe dy nipërit e tij kanë vdekur gjithashtu.
Ministria e Jashtme e Austrisë tha se dy nga shtetasit e saj ishin gjithashtu në mesin e të vrarëve dhe se trupat e tyre ishin nxjerrë nga provinca Kahramanmaras e Turqisë.
Një shtetas danez raportohet i zhdukur, i tha Ministria e Jashtme e Danimarkës transmetuesit DR.
Gjithashtu më herët gjatë ditës së sotme, u raportua se tre shtetas britanikë janë zhdukur.
