Policia e Shtetit është një tjetër institucion që po përdoret nga mazhoranca dhe drejtuesi i saj, kryeministri Edi Rama, për zgjedhjet lokale të 14 Majit.
Pasditen e 11 Janarit, kreu i qeverisë mblodhi në një takim informal drejtues të Policisë në qarqe. Në takimin e zhvilluar te vila qeveritare Nr.30, në zonën e ish-Bllokut, ishte prezent dhe kryepolici Muhamet Rrumbullaku, si dhe shefi politik i këtij të fundit, ministri i Brendshëm Bledi Çuçi.
Zyrtarisht, nga policia dhe qeveria nuk pati një prononcim lidhur me takimin dhe qëllimin pse u thirr.
Shqetësimi i opozitës
Ndërkaq, opozita denoncoi se, ishte një “darkë elektorale e Ramës me drejtuesit e policisë”. Në një reagim në rrjetet sociale po atë mbrëmje, Berisha do të shprehej se kemi të bëjmë me “një shkelje flagrante të statusit të Policisë së Shtetit dhe kodit elektoral”.
Për çështjen foli edhe në një deklaratë për mediat një ditë më pas, duke theksuar se “darka ishte një element kriminal elektoral”. Rama, tha Berisha, “nuk ka ndërmend të veprojë ndryshe, përveçse të shkelmojë votën e shqiptarëve”.
“Ftoj çdo demokrat të hapë një regjistër të veçantë për çdo shef komisariati dhe të regjistrojë çdo akt të tij. Një libër për krimet e Policisë së Shtetit. Udhëzimet e dhënë nga Edi Rama janë goditja fatale për këtë institucion”, u shpreh Berisha, nga selia blu.
Urdhëri i Ramës
Siç mëson Gijotina, shqetësimet e opozitës nuk janë të pabaza.
Burime pranë policisë bënë me dije se një sërë urdhrash për ndryshime në nivel drejtuesish në komisariatet e vendit kanë nisur të vihen në jetë.
Kreu i policisë, Muhamet Rrumbullaku ka firmosur disa ndryshime në nivel zëvendësdrejtorësh dhe shefa komisariati. Ndryshimet, siç bëjnë me dije burime kofidenciale pranë Policisë, vijojnë pikërisht pas porosive të kryetarit të PD-së Edi Rama në darkën te ish-Blloku. Qëllimi, siç mësohet se u urdhërua në atë darkë, është mobilizimi i uniformave blu nën urdhrat e Partisë Socialiste për lokalet e 31 Majit.
Ndryshimet
Shefi i komisariatit Devoll i cili u pezullua më herët pasi dyshohet se lejoi prerjen e paligjshme të pyjeve, është emëruar Kreshnik Alimadhi.
Nga detyra lëviz dhe Edmond Pjetri i cili deri më tani ka mbajtur detyrën e shefit të komisariatit nr. 2 në kryeqytet. Në vend të tij u emërua Loard Sallaku.
Rokadë për drejtuesit e komisariatit Sarandë dhe Pogradec. Oljon Agollit iu besua drejtimi i komisariatit Sarandë, ndërsa Klodian Kondit komisariati i Pogradecit.
Idriz Daulle u emërua shef i komisariatit Shkodër duke zëvendësuar në detyrë Asllan Shytin.
Ndryshime dhe në nivel zëvendësdrejtorësh, me Elton Alushin i cili emërohet në Vlorë, ndërsa Ardit Elmazi në Korçë.
Ndryshime, sipas të njëjtave burime, priten dhe ditët në vijim.
