Ditën e sotme u zhvillua në Presidencë ceremonia e betimit të anëtares së re të Gjykatës Kushtetuese, Marjana Semini. Ajo vuri dorën mbi Kushtetutën e Shqipërisë. Pas ekzekutimit të himmit kombëtar dhe leximit të vendimit përkatës, ajo u shpreh: “Betohem se gjatë kryerjes së detyrave të mia do t’i qëndroj kurdoherë besnike Kushtetutës së Republikës të Shqipërisë”.
Presidenti Bajram Begaj i uroi suksese Seminit në detyrën e re të anëtares së Gjykatës Kushtetuese.
Në ceremoninë solemne të betimit ishin të pranishëm Kryetarja e Gjykatës Kushtetuese, Vitore Tusha, kryetarja e Komisionit të Ligjeve në Kuvendin e Shqipërisë, Klotilda Ferhati Bushka, përfaqësues të Delegacionit të BE-së si dhe OPDAT si dhe anëtarë të Kabinetit të Presidentit të Republikës.
