Gjykata ka dhënë masën e sigurisë “arrest me burg” për nënë e bir, Rozeta dhe Havier Dobi, të akuzuar për vjedhjen e një shume mbi 500 mijë euro, përfshirë dhe bizhuteri të shtrenjta.
Ata dolën sot para togave të zeza me kokën ulur për të shmangur edhe fiksimin nga kamera. I pari që hyri në kafazin e xhamit ishte 23-vjeçari Havier Dobi, me pranga në duar. Pas tij, pak sekonda më vonë, e shoqëruar nga policia, erdhi 49-vjeçarja por pa pranga në duar.
Nënë e bir u arrestuan për grabitjen e një shume prej 120 mijë euro në banesën e zyrtares së lartë në Kryeministri, Alda Klosi, ku 49-vjeçarja punonte si pastruese.
Pastruesja, sipas raportimeve të deritanishme, kishte hyrë në banesë me çelësin që i kishte lënë Klosi për ta pastruar dhe kishte vjedhur para në interval të ndryshme kohore, por ditën e fundit kishte hapur derën me forcë dhe kishte bërë rrëmujë në banesë, për të inskenuar një grabitje.
Gjithçka është zbuluar nga kamerat e sigurisë. Vetë ish-zyrtarja thotë se paratë i kishte ruajtur për të kuruar xhaxhain e saj, që e kishte me kancer dhe të shtruar në një spital në Shtetet e Bashkuara të Amerikës. Por edhe për të ka nisur një hetim për të zbuluar nëse thotë të vërtetën e nëse mund të justifikojë burimin e parave që i janë gjetur në shtëpi.
Por Klosi nuk është “viktima” e vetme, pasi nënë e bir akuzohen edhe nga 4 persona të tjerë se i kanë vjedhur. Pas shumës së 120 mijë eurove, në shtëpinë Dobi, në tubin e aspiratorit janë gjetur edhe mbi 400 mijë euro të tjera.
