Ish-presidenti i Shteteve të Bashkuara të Amerikës Donald Trump është paditur nga familjarët e oficerit të policisë së Kapitolit, Brian Sicknick, i cili vdiq pas sulmit të 6 janarit të vitit të shkuar në Kongres. Ata pretendojnë se fushata e Trump për zgjedhjet presidenciale ishte një “retorikë nxitëse”. Në padi përmendet Trump dhe dy rebelë të tjerë që sulmuan Sicknick .
Bashkëshortja e të ndjerit, Sandra Garza pretendon se refuzimi prej muajsh i Trump për të njohur fitoren e Joe Biden nxiti dhunën që rezultoi fatale për Sicknick.
“Shumë pjesëmarrës në sulm kanë zbuluar që atëherë se ata po vepronin sipas asaj që ata besonin se ishin urdhra të drejtpërdrejta të të pandehurit Trump në shërbim të vendit të tyre. Trump nxiti drejtpërdrejt dhunën në Kapitolin e SHBA-së që pasoi dhe më pas shikoi me miratim teksa ndërtesa u pushtua. Ai i bëri të gjitha këto për përfitimin e tij personal dhe qëllimet e tij partiake”, thuhet në padi.
Më tej shkruhet se fjalimi i Trump disa orë përpara trazirave, duke u bërë thirrje njerëzve të “luftojnë si ferr”, ishte “kulmi i një përpjekjeje të koordinuar për të përmbysur votën e lirë”.
Ajo çka e bën rastin më të bujshëm është fakti se ekzaminuesi mjekësor përcaktoi se Sicknick vdiq nga “shkaqe natyrore”.
Padia argumenton se Trump e dinte se kaosi dhe dhuna mund të rriteshin nga retorika e tij.
“Ngjarjet e tmerrshme të 6 janarit 2021, duke përfshirë vdekjen tragjike të oficerit Sicknick, ishin një pasojë e drejtpërdrejtë e veprimeve të paligjshme të të pandehurve. Trump ishte i vetëdijshëm se veprimet e tij para dhe më 6 janar 2021 promovuan dhe inkurajuan turmën që të sulmonte dhunshëm Kapitolin e SHBA.”
