Bordi i Transparencës është mbledhur ditën e sotme për të përcaktuar çmimet e reja të tregtimit të karburanteve në vendin tonë ku vihet re një ulje me qindarka e çmimeve duke u tallur kështu me qytetarët.
Sipas njoftimit, është ulur me 3 lekë çmimi i shitjes me pakicë të naftës, pra do të shitet me 199 lekë, nga 202 lekë që ishte më parë.
Ndërsa benzina është ulur me 1 lekë duke shkuar në 177 lekë për litër. Çmimi i gazit të lëngshëm mbetet i pandryshuar, teksa do të shitet me 71 lekë për litër.
Çmimet e karburanteve në vendin tonë vijojnë të mbeten ndër më të larta në rajon dhe Evropë, pavarësisht uljeve të vazhdueshme në bursa.
Njoftimi i Bordit:
Vendimet e Bordit të Transparencës në datë 20 Dhjetor 2022 kanë ndryshime të çmimit nga ai i përcaktuar në mbledhjen e fundit.
Si rrjedhojë çmimet e vendosura janë :
Çmimi i shitjes me pakicë i nënproduktit gasoil i standardit SSH EN 590 të jetë jo më shumë se 199 lekë/litri, ndërsa i shitjes me shumicë jo më shumë se 187 lekë/litër.
Çmimi i shitjes me pakicë i nënproduktit benzinë e standardit SSH EN të jetë jo më shumë se 177 lekë/litri, ndërsa i shitjes me shumicë jo më shumë se 165 lekë/litër.
Çmimi i shitjes me pakicë i nënproduktit gaz, të jetë 71 lekë/litri me pakicë dhe i shitjes me shumicë 59 lekë/litër për automjetet.
Çmimi i gazoilit për peshkim është vendosur 106 lekë/litër.
Çmimet e caktuara nga Bordi do të hynë në fuqi në datë 20 Dhjetor, ora 18.00, dhe do të jenë të vlefshme deri në mbledhjen e ardhshme të bordit ku do të pasqyrohen ndryshimet e çmimeve të shitjes.
Bordi i transparencës që në krijimin e tij i është përmbajtur me përpikmëri në vendimet e tij lëvizjes së bursës Platts të Mesdheut për gazoilin, benzinën, si dhe faturave zyrtare të operatorëve.
Ministria e Financave dhe Ekonomisë ndjen detyrimin të sqarojë opinionin publik se jo çdo lëvizje e bursës së naftës bruto reflektohet në të njëjtën kohë dhe në të njëjtën masë në bursën e gazoilit dhe benzinës.
