Kreu i Bashkisë Himarë, Jorgo Goro, mbyll katër tenderë në pak ditë, mes shkeljeve dhe abuzimeve. Duket se pas lavdërimeve që mori nga kryeministri Rama për pastërtinë e qytetit, Goro ka marrë vrull dhe po bën kërdinë me fondet. Në fakt janë miliona lekë të çuara dëm për fasada dhe arnime rrugicash, të cilat duhej të ishin rikonstruktuar me kohë dhe jo tashmë që kushtet atmosferike nuk janë të favorshme. Por, Jorgo Goro nxiton para zgjedhjeve dhe firmos katër tenderë brenda një jave.
Tenderi i parë ka si objekt “Përmirësim i ndriçimit me llamba led i rrjetit rrugor” dhe për të Goro do të shpenzojë mbi 20 milionë lekë. Për këtë projekt kanë paraqitur interes vetëm dy kompani “SARK SHPK” dhe “ASI-2A CO SHPK”. Kjo e fundit është skualifikuar menjëherë nga gara dhe pse kishte ofertë më të lirë. Kështu mbeti të zgjidhet vetëm kompania “SARK SHPK” e Arben Kajollit. Jorgo e firmosi kontratën pa konkurrencë. Open Data Albania i ka vënë “Flamurin e Kuq” sepse ka risk për korrupsion dhe abuzim me paratë e taksapaguesve.
Merr tender kushëriri i Krajës
Tenderi i dytë i firmosur po në të njëjtën ditë mbart vlerë edhe më të lartë. Sipas të dhënave të dokumentacionit, Bashkia Sarandë po jep 140 milionë lekë për “Rikonstruksion i rrugicave dhe i qendrës së fshatit Qazim Pal”. Këtë kontratë e ka përfituar kompania “KARL GEGA KONSTRUKSION” SHPK, me pronarë Luan Kopliku – 25%, Shkëlqim Rakipaj – 25%, Hartjan Sallaku – 25% dhe Hasan Hafizi – 25%.
Ky i fundit është mjaft i njohur dhe mund të jetë një nga ortakët më të fortë që i siguron tendera me vlera kaq të larta kompanisë. Hafiz është gjithashtu edhe pronari i kompanisë “Albavia shpk”. Tashmë të gjithë e dimë se ai është kushëriri i Arben Krajës, drejtuesit në ikje i SPAK. Hafizi ka miq edhe më të fortë. Ai është edhe burri i ish-deputetes “rilindëse” Mimoza Hafizi. Prandaj vërejmë se ky tender ka vlerën më të lartë nga 4 të tillë që ka lëshuar Jorgo në këto ditë.
Në të njëjtën ditë (16-12-2022) Jorgo Goro ka firmosur dhe një tjetër kontratë me vlerë 60 milionë lekë.
Bëhet fjalë për tenderin me numër reference REF-43976-09-29-2022 dhe objekt “Rikonstruksion i pjesshëm i rrugës Lukovë”. Ky tender i është dhënë kompanisë “ “MANE/S” SHPK”, nën drejtimin e Bledi Manes.
Ky i fundit ka përfituar shumë tenderë me vlera marramendëse nga institucionet. Vlen të theksojmë këtu se vetëm në tre vitet e fundit ka përfituar 294,507,943.00 lekë transaksione nga Thesari Shtetit. Veçojmë se, më të shumta janë kontratat me Jorgo Goron.
340 milionë lekë për fasadën e zjarrfikësve
Ndërsa tenderi i katërt nuk është për arnim rrugësh, por për fasadën e godinës së zjarrfikësve. Një institucion që kanë nevojë për investim të thellë, por Goro i rregullon fasadën, meqenëse ajo bie në sy gjatë zgjedhjeve. Sipas dokumentit, 410 milionë lekë do të merren nga buxheti i bashkisë për të rregulluar fasadën e një godine që po kalbet nga brenda. 9 kompani kanë paraqitur ofertat e tyre, por fituese është shpallur firma “NIKA SHPK”. Lehtë fare, një tjetër biznesmen mbushi arkën i ndihmuar nga abuzimet e kryebashkiakut Jorgo Goro.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
