Kandidati në garë për kreun e SPAK, prokurori Edvin Kondili deklaroi gjatë prezantimit të kandidaturës së tij përpara KLP-së, se dëshiron të drejtojë organin e akuzës pasi beson se ka eksperiencën e duhur dhe kurajën për ta bërë një gjë të tillë.
I preferuari i Ramës për kreun e SPAK, tha se Prokuroria e Posaçme ndodhet në një fazë vendimtare për konsolidimin e saj, dhe kërkon një analizë e dobësive për të nxjerrë mësime për të ardhmen.
“I jam përgjigjur thirrjes nga KLP për vendin vakant për drejtuesin e Prokurorisë së Posaçme, kam aplikuar pasi kam vlerësuar të gjithë eksperiencën dhe kurajon për të drejtuar këtë institucion. Kjo është një fazë vendimtare për konsolidimin e prokurorisë së Posaçme, ku kërkon analizave të dobësive me qëllim për të nxjerrë përfundime për të ardhmen. Angazhimi im do të jetë maksimal nëse fitoj.
Kam 18 vjet që ushtroj detyrën e prokurorit, 15-vite pranë Prokurorisë së Krimeve të Rënda dhe pas mbylljes së saj prokurorë në SPAK. Gjatë këtyre 18-viteve kam hetuar të gjitha veprat penale, por më tepër ato që lidhen me korrupsionin.
Unë shkurtimisht përmend faktin se veprat penale që kam përfaqësuar në gjykim kanë pasur të bëjnë me trafikun e lëndëve narkotike, trafikun e armëve dhe municioneve, grup të strukturuar kriminal , vrasje e funksionarit të policisë, si dhe vrasje brenda familjes”, tha Kondili.
