Këshilli i Lartë i Prokurorisë ka nisur seancën dëgjimore të kandidatëve të ri të SPAK. Kandidati i parë që po prezanton platformën e tij është Adnan Xholi.
Adnan Xholi ka deklaruar para KLP se drejtuesi i kësaj Prokurorie të Posaçme duhet të mbajë përgjegjësi për çështjet e korrupsionit të zyrtarëve të lartë dhe krimit të organizuar.
Teksa prezantonte platformën, Xholi u shpreh se ai ka hetuar një sërë ngjarjesh të rëndësishme siç ishin zhvillimet e ’97 dhe vrasjet apo rrëmbimet e personave në Gjirokastër.
“Mendoj që cilësitë e mira mund të shërbejnë edhe si drejtues. Drejtuesi është i pari mes të barabartëve. Eksperienca për ndjekjen e çështjeve sensitive, që në Gjirokastër kam mbajtur peshën kryesore për vrasjet dhe rrëmbimet e personave. Si Prokurorisë së Krimeve të Rënda, kam qenë pjesë e hetimeve të ngjarjeve të ndodhura në ’97 ose pasojat e saj. Kam hetuar dhe përfaqësuar akuzën në hetim. Diçka e veçantë me këto çështje është që kanë nisur hetimet pas 10 viteve. Janë përdorur edhe bashkëpunëtorët e parë të drejtësisë. Pjesa dërrmuese e të pandehurve kanë marrë +20 vite dënim, por 3 prej tyre kanë marrë dënim të përjetshëm, dënim që ende e kam. Kam bashkëpunuar me të huajt sa i përket lëndëve narkotike. Janë dënuar shtetasit shqiptarë që kryenin krimet në vendet e huaja. Kam qenë prokuror që paralelisht me penalin është hetuar edhe pasurori. Vetëm në një çështje vlera monetare kap shifrën e 2.6 mln eurove”, tha Xholi.
