Ditën e sotme banorët që jetojnë në pallatin nr.4 në rrugën “Myslym Keta” në Tiranë kanë dalë në protestë pasi u është kërkuar që të largohen nga banesat e tyre, të cilat do prishen.
Banorët thonë se kjo po bëhet për t’i hapur rruge ndërtimeve të Bashkisë pasi shtëpitë ata i kanë riparuar dhe dëmtimet kanë qenë të nivelit Ds3 dhe Ds2. Në këtë nivel dëmtimi banesat duhet të riparohen dhe jo të shkatërrohen.
“Kjo është vetëm për fitimet e tyre. Shtëpinë e kam ashtu që nga koha e tërmetit”, tha një e moshuar me lot në sy.
Një tjetër person u shpreh: Këto punë që bëhen këtu nuk bëhen në asnjë vend tjetër.
Krah tyre ka shkuar edhe deputeti i PD Belind Këlliçi. Banorët thonë se pasi të shembet nuk iu është thënë se ku do strehohen dhe nuk kanë marrë asnjë përgjigje. Ata ankohen se u është prerë energjia elektrike dhe gjithashtu furnizimi me ujë.
Banorët thonë se nuk ka vendim gjykate për prishjen e pallatit dhe se shkalla e vlerësimit për këtë pallat pas tërmetit ka ndryshuar disa herë. Banorët kanë dyshime se pas shembjes së pallatit fshihen interesa të tjera.
