Një patrullë e Policisë së Kosovës është sulmuar me armë zjarri në Zveçan. Si pasojë e incidentit, një polic është lënduar lehtë dhe janë shkaktuar dëme të konsiderueshme materiale në veturën e policisë.
Sipas PK-së, njësitet policore deri sa kanë qenë në detyra të rregullta, në patrullim, janë sulmuar nga persona të armatosur me armë të gjata, nga një automjet i tipit Audi, ngjyrë hiri, me targa KM.
“Njësitet relevante policore kanë dalë në vendngjarje, për të kryer hetimet, kurse zyrtari policor i lënduar është transportuar në QKMF për ofrimin e ndihmës mjekësore”, kanë thënë policia.
Ndërkaq sulmi ka ndodhur pak orë pasi Policia e Kosovës shtoi prezencën e saj në veri.
Duhet theksuar se në kohën kur po bëhen përgatitjet që në katër komunat e veriut të organizohen zgjedhjet për kryetarë komunash, policia është përballur me sulme të vazhdueshme nga persona të panjohur.
