Gijotina.com ka denoncuar ditët e fundit disa tenderë abuzivë që ka zhvilluar kryetari i Bashkisë Korçë, Sotiraq Filo. Gjithsesi kryebashkiaku, që i ka shpatullat të mbrojtura, ka vazhduar me stilin e tij, duke hedhur fonde në tenderë me shkelje. Prokurimi i fundit është për rregullimin e një rruge. Konkretisht bëhet fjalë për njoftimin me numër reference “REF-45619-10-12-2022” dhe objekt “Investime në infrastrukturën rrugore”. Në tender nuk përcaktohet se për cilët rrugë bëhet fjalë.
Por, tashmë e dimë qe riparimi i rrugëve në fushatë zgjedhore është një nga metodat që përdorin të gjithë drejtuesit e bashkive. Kështu me fasada, të cilat, pas disa javësh shkatërrohen, ata kërkojnë sërish votën nga qytetarët. Këto janë paratë e taksapaguesve, që nga njëra anë përdoren për propagandë bajate. Nga ana tjetër xhirohen në xhepat e klientëve.
Tenderi për të cilin flasim, po merr jo pak, por 1 miliard lekë nga buxheti i bashkisë Korçë.
Në dokumentin publikuar vihet re për këtë prokurim kanë shfaqur interes 11 kompani, sepse fondi limit është llokmë e madhe. 10 kompani janë skualifikur me justifikimin se nuk kanë paraqitur dokumente që tregojnë se kanë eksperienca të mëparshme në rikonstruksionin e rrugëve. Edhe pse shumë prej tyre njihen për punimet shumëvjeçare për ndërtim dhe mirëmbajtje rrugësh.
Në këto kushte, Bashkia ka lënë në garë vetëm kompaninë “Almo Konstruksion” në pronësi të Edmond Bitrit dhe Alfons Bitrit. Dhe në përfundim ia ka dhënë tenderin pa zhvilluar një garë komfort rregullave të prokurimeve publike. Kështu, Open Data i ka vendosur këtij prokurimi “Flamurin e Kuq”, duke ngritur alarmin për rrezikun e abuzimin me këtë fond.
Ndërkohë nga të dhënat e grumbulluara, Gijotina.com evidenton se brenda këtij viti Bashka Korçë regjistron 22 tenderë me “Red Flag”. Të cilët kanë mungesë konkurrence, fonde të fryra dhe bashkëpunim me kompani që përvetësojnë këto para. Ndërkohë për Krishtlindje, Sotiraq Filo e ka hapur krahun të shfrytëzojë çdo qindarkë të buxhetit 2022.
Lexo edhe: Lulishte zgjedhore/ Adrian Gurma i fal 100 mln lekë Bledar Manes
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
