Deputeti demokrat, Agron Shehaj, ka komentuar sulmin e sotëm ndaj kryetarit të Partisë Demokratike, Sali Berisha. Me anë të një postimi në Facebook, Shehaj e ka quajtur këtë sulm, një akt të planifikuar djallëzisht për qëllime politike si përgjigje e protestës së opozitës për të denoncuar Ramën në ditën e Samitit në Tiranë.
Postimi i Shehaj:
Dhuna ndaj liderit të opozitës Z.Berisha, është veprim tronditës dhe kriminal. Gjithçka të bën të mendosh se kemi të bëjmë me një akt të planifikuar djallëzisht për qëllime politike si përgjigje e protestës së opozitës për të denoncuar Ramën në ditën e Samitit në Tiranë. Edi Rama ka krijuar modelin e dhunës ndaj kundështarëve dhe kritikëve: tritol, dhunë dhe bastisje policore, sekuestrim dhe shpronësim. Mbi të gjitha ai mbjell përditë urrejtje me gjuhën e tij ndaj mediave dhe gazetarëve, ndaj kundërshtarëve dhe partive politike, dhe ndaj çdokujt që është kritik me të. Rama duhet larguar, mbi të gjitha, për t’i dhënë fund dhunës dhe urrejtjes së përditshme që mbjell kudo.
Çfarë ndodhi sot?
Gerti Shehu, 31-vjeç sulmoi mesditën e sotme kreun e PD-së Sali Berisha, teksa ky i fundit ishte duke marshuar drejt bulevardit “Dëshmorët e Kombit” për të marrë pjesë në protestë. 31-vjeçari goditi me grusht në fytyrë Berishën duke e gjakosur. Ai u ndalua menjëherë nga truprojat e Berishës dhe ndërkohë u dhunua nga mbështetës dhe simpatizantë të PD-së. 31-vjeçari u shoqërua nga policia dhe aktualisht po merr mjekim në spitalin e Traumës, pasi ka dëmtime në fytyrë dhe fraktura në hundë. Oficerët kanë tentuar dy herë për të marrë në pyetje të riun, por për shkak të gjendjes së tij shëndetësore, ai nuk ka dhënë deri tani asnjë dëshmi. Dyshohet se 31-vjeçari vuan nga probleme të shëndetit mendor.
