Partia Demokratike dhe Partia e Lirisë do të firmosin sot marrëveshjen në lidhje me zgjedhjet lokale që pritet të mbahen më 14 maj të vitit 2023. Marrëveshja është konkretizuar pas takimit mes dy kryetarëve Sali Berisha dhe Ilir Meta, që u zhvillua një ditë më parë në selinë blu, në prezencën e sekretarit të përgjithshëm të Partisë Demokratike, Flamur Noka.
Pas takimit me Berishën, Meta tha se kandidati për kryetar bashkie do të dalë nga PD përmes “Primareve” ndërsa kandidati për Kryetar i Këshillit Bashkiak vjen si propozim i PL. Emri është propozuar vetë nga Meta që nuk dha detaje të tjera por e cilësoi si një “superpolitikan”.
Dy liderët janë dakordësuar dhe për datë e protestës kombëtare që do të zhvillohet më 12 nëntor. Zgjedhjet lokale pritet të mbahen më 14 maj të vitit të ardhshëm, 2023. Selia blu ka nisur procesin e primareve që do të mbyllet më 14 dhjetor, përveç Tiranës, Durrësit e Elbasanit, qytetet ku procesi do të përfundojë më herët për shkak të rëndësisë që ka.
Deri më tani ish-deputetja e Partisë Demokratike, Mimoza Hajdarmataj ka qenë e para në PD, që ka bërë të ditur se ka vendosur të hyjë në Primare për të dalë si kandidate për kryebashkiake në Tropojë. Për Tiranën janë lakuar disa emra, mes tyre edhe mjeku Ilir Alimehmeti, por zyrtarisht nuk ka asnjë konfirmim.
