Ministri i Brendshëm i Rumanisë, Petre Toba dha dorëheqjen pasi disa prokurorë të njësisë anti-korrupsion i kërkuan presidentit aprovimin për hetimin e tij
Sipas mediave lokale prokurorët e akuzojnë ministrin se ka refuzuar qëllimisht të vërë në dispozicion të tyre disa dokumenta që kanë të bëjnë me një hetim ndaj parardhësit të tij në këtë detyrë.
Disa oficerë të Departamentit të Inteligjencës dhe Sigurisë së Brendshme akuzohen se kanë përvetësuar rreth 102 mijë dollarë nga fondet e shtetit. Por, nga ana e tij, Toba mohon çdo akuzë dhe i cilëson ato si të motivuara politikisht. Ai deklaroi se, dorëheqjen e dha “për të mos përfshirë Ministrinë e Brendshme në një skandal publik”.
Ligji rumun parashikon se hetimi ndaj një ministri mund të bëhet vetëm me lejen e presidentit të vendit, raporton agjencia “Reuters”.
