Njëri prej të akuzuarve për vrasjen e dyfishtë të babë e bir Gentian dhe Nezir Beqiri, Klajdi Dokoli ka mohuar akuzat ndaj tij në seancën e sotme në Gjykatën e Posaçme kundër Korrupsionit dhe krimit të organizuar.
“Në atë kohë isha në shtëpi, isha aksidentuar me motor, nuk e kam njohur kurrë Gentian Beqirin, vrasjen e tij e kam marrë vesh nga televizori. Nuk kam pasur asnjëherë probleme me drejtësinë. Kam punuar disa herë jashtë në ndërtim. Nuk e kuptoj pse jam këtu, unë jam i sëmurë”, është shprehur ai.
GJKKO pranon dëshminë e tregtarit të makinave
Të njëjtat burime, bënë të ditur për mediat se seanca e radhës ka pranuar dëshminë e një tregtar makinash në Tiranë, i cili quhet Elvin Korbi. Para trupës gjykues Korbi mësohet se ka thënë se nga zyra e tij e punës në afërsi të ish-stacionit të trenit në Tiranë, në vitin 2012 u ka dhënë një makinë me qera dy personave të pandehur, Ervis Bardhi dhe Jorgo Leku. Ngjarja ndodhi para se të vritej Gentian dhe Nezir Beqiri në Elbasan. Ndërkohë në dëshminë e tij, Ervis Bardhi, pranon se makina është përdorur me qëllim lëvizjen e tyre rreth pallatit ku banonte familja Beqiri dhe vende të ndryshme në Tiranë dhe Elbasan. Emri i Elvin Korbit si dëshmitar ka dalë pikërisht nga dëshmia e Ervis Bardhit, i cili u ka thënë policisë se para se të kryenin vrasjen, kishin marrë një makinë me qira, me të cilën gjatë periudhës së përdorimit ishin gjobitur disa herë. Nga ana tjetër mësohet se Korbi ka pretenduar para gjykatës se nuk e kishte parë ndonjëherë në dyqanin e tij, të pandehurin Ervis Bardhi. Në fakt ka qenë vetë Ervis Bardhi, ai që ka çuar policinë dhe prokurorinë e Elbasanit, pikërisht në biznesin e Elvin Korbit në zonën e ish-stacionit të trenit në Tiranë.
Prokurorët dyshojnë se Korbi ka njohje me Ardjan dhe Florenc Çapjan
Sipas prokurorisë, Korbi ka njohje me Ardjan dhe Florenc Çapjan në Elbasan. Kjo njohje është faktuar dhe gjatë arrestimit të Florenc Çapjas në muajin qershor 2019, gjatë operacionit “Krasta”, ku bashkë me Florencin në polici mësohet të jetë shoqëruar dhe Elvin Korbi. Ky i fundit pasi është marrë në pyetje, u lirua pasi nuk rezultonte i implikuar në veprimtari të kundraligjshme. Në seancën e radhës ishte planifikuar dhe pyetja e dy dëshmitarëve të tjerë, por për shkak të mungesës së tyre, gjyqi u shty për të mërkurën e ardhshme. Gjatë fazës së hetimit, Ervis Bardhi, është marrë disa herë në pyetje nga prokuroria, duke treguar dinamikën e vrasjes së babë e bir dhe pazaret, që kanë kryer me të pandehurit e tjerë, Ardian dhe Florenc Çapja, për vrasjen e Gentian Beqirit, si dhe personat e tjerë Olsi Leku, Klajdi Dokoli dhe Etien Cani. Hetimet për vrasjen e ndodhur në vitin 2012, u rihapën 6 vite më pas për shkak të dëshmisë të së penduarit, Ervis Bardhit, i konsideruar si ekzekutuesi fizik i Gentian Beqirit në apartamentin e tij. Dëshmia e Bardhit u konsiderua e besueshme nga Prokuroria, teksa ai ka treguar me detaje mënyrën e vrasjes dhe faktin që ka marr 50 mijë euro për vrasjen.
