Sulmi ndaj sistemi TIMS ka shkaktuar radhë të gjata e kaos në Portin e Vlorës. Qytetarët shprehen se kanë gati tre orë që presin aty dhe ende nuk kanë kaluar. Disa kanë dhënë pasaportat për të kaluar, disa të tjerë presin biletat.
“Kam që në orën 10, pres biletën, paguaj lekë për t’u torturuar këtu. Dhe nuk vij më në Shqipëri. U betova, do hedh pasaportën. Është torturë, në vapë.
Shikoje bluzën se si është bërë. Jo vetëm unë, por të gjithë këta këtu,” shprehet një qytetar.
Ai shprehet se askush nuk u ka dhënë asnjë sqarim, ndërsa shoferi i autobusit u ka thënë të presin biletën.
Lajmi i sulmit kibernetik u bë fillimisht i ditur nga kryeministri Edi Rama, i cili u shpreh se janë të njëjtët agresorë, pra nga Irani dhe se po punohet me aleatët për t’i bërë të papenetrueshme sistemet tona digjitale.
“Një tjetër sulm kibernetik nga të njëjtët agresorë, tanimë të ekspozuar dhe dënuar prej vendeve aleate e mike të Shqipërisë, është shënuar mbrëmë mbi sistemin TIMS! Ndërkohë vazhdojmë punojmë përditë pa orar me aleatët për t’i bërë të papenetrueshme sistemet tona digjitale”, shkruan Rama.
