Një ish-drejtor i Erion Veliajt ka fituar një tender nga Bashkia e Tiranës për shërbime konsulence strategjike. Bëhet fjalë për ish-drejtorin e Përgjithshëm të Zhvillimit Ekonomik në Bashkinë e Tiranës, Enkelejd Musabelliu, i cili është “shpërblyer” nga ish-eprori. BoldNews.al ka siguruar dokumentet e tenderit, ndërsa ka hulumtuar edhe dokumente të tjera që faktojnë lidhjen e z.Musabelliu me Bashkinë e Tiranës, teksa ka dyshime të mëdha për konflikt interesi. Në dokumente është shkruar mjaft qartë se shërbimet e konsulencës, z.Musabelliu, do ti ofrojë edhe për drejtorinë që ka drejtuar. Por, emri i këtij ish drejtori lidhet edhe me projektin e famshëm të Bashkisë së Tiranës, atë të dhënies me PPP të shkollave publike në kryeqytet. Madje, edhe i një sërë veprimesh të tjera, ndërsa tashmë ish-drejtori do të paguhet për “konsulencë strategjike”.
Pak ditë më parë, Bashkia e Tiranës shpalli fituesin e procedurës tenderuese me objekt “shërbim konsulence”, ndërsa përshkrimi i kontratës ishte “konsulencë strategjike Tik”. Tenderi është shpallur në datë 23 maj 2022, ndërsa firma e vetme që ka marrë pjesë në garë është operatori ekonomik “Adriatica RC”, e cila ka pasur një vlerë të ofertës prej 6.545.000 lekë (me TVSH 7.854.000) dhe totali i pikëve të marra ka qenë 93.6. Firma, e cila sipas këtij dokumenti, ka si adresë njësinë Bashkiake nr.5 në Tiranë.
BoldNews.al hulumtoi dokumente të tjera, teksa sipas QKB-së, firma “Adriatica RC”, fituese e tenderit të Veliajt, është themeluar në datën 6 mars 2020. Objekti i firmës është “konsulencë dhe shërbime në fushën e shoqërisë së informacionit, teknologjisë së regjistrave të shpërndarë, sistemeve të informacionit, komunikimit dhe menaxhimit. Konsulencë në fushën e drejtësisë… etj, etj”. Pronar me 100 % të aksioneve është z. Enkelejd Musabelliu, i cili është njëkohësisht edhe administrator i kësaj shoqërie.
Por, kush është z. Enkelejd Musabelliu?! BoldNews.al bëri një kërkim të thjeshtë në internet, ku do të gjesh me dhjetëra lajme dhe kronika të mediave të ndryshëm me emrin e z. Enkelejd Musabelliu. Bazuar në këto kronika, ai ka qenë drejtor i Përgjithshëm i Zhvillimit Ekonomik në Bashkinë e Tiranës. Madje, BoldNews.al shfletoi edhe dokumente të vendimeve të ndryshme të Veliajt, ku emri i këtij personi rezulton si punonjës i Bashkisë së Tiranës.
Sipas specifikimeve teknike të këtij tenderi, rezulton se konsulenca strategjike që kërkon Bashkia e Tiranës ka të bëjë edhe me drejtorinë që ka drejtuar z. Enkelejd Musabelliu. Ja çfarë shkruhet në këto dokumente për Drejtorinë e Përgjithshme të Projekteve Strategjike dhe Zhvillimit Ekonomik;
Të nxisë zhvillimin ekonomik urban e rural nëpërmjet përmirësimit të klimës së biznesit dhe propozimeve lehtësuese në paketën fiskale vendore, menaxhimit efikas të territorit dhe tokës bujqësore.
Të rrisë kapacitetet institucionale të strukturave të Drejtorisë së Përgjithshme të Projekteve Strategjike dhe Zhvillimit Ekonomik.
Të ruajë parimet e eficensës, efikasitetit dhe ekonomisë në të gjitha detyrat e ndjekura.
Të përfitojë programe financuese (IPA 2, CrossBorder, BAS, Smile etj.)
Të planifikojë dhe ndërtojë sheshe sportive në blloqe rekreative banimi, rikonstruksione shkollash me fonde donatorësh.
Të promovojë kapacitetin ekonomik të territorit nën administrim, me qëllim thithjen e investimeve vendase dhe të huaja dhe nxitjen e punësimit.
Natyrisht, pikat e para kanë të bëjnë me investimet strategjike, të cilat i kemi dëgjuar shpesh kohët e fundit. Dhe, duke qenë se Musabelliu ka qenë një nga nismëtarët e PPP-ve të shkollave, nuk përjashtohet mundësia që territore të Bashkisë së Tiranës t’i jepen privatëve, ku pjesë është edhe ish-drejtori!/BoldNews.al/
