Tre tërmete të forta kanë goditur gjatë natës Italinë qëndrore. I pari dhe më i forti me magnitudë 6.2 ballë i shkallës Rihter është regjistruar rreth orës 03:36 rreth dy km nga qyteti i Accumolit dhe 10 km nga Arquata del Tronto dhe Amatrice.
Deri tani janë konfirmuar 120 viktima citojnë zyrtarët italianë BBC. Deri tani nuk ka raportime për shqiptarë të vdekur por flitet për 6 të plagosur. Ndërkohë në një dëshmi në Ora News Hamza Serjani tha se në komunën e Amatrices jetojnë 10 familje shqiptare dhe se mes miqve të tij të vdekur ka dhe shqiptarë. Ministria e Jashtme shqiptare mohon që deri tani të ketë viktima.
Qytetet më të prekura nga tërmeti janë Accumoli, Amatrice, Posta dhe Arquata del Tronto. Kryetari i kësaj komune ka thënë se shumë njerëz të tjerë janë të bllokuar nën gërmadha.“Rrugët janë të bllokuara. Gjysma e qytetit është zhdukur”, ka thënë kryetari i kësaj komune, Sergio Pirozzi. “Ka njerëz që janë të bllokuar nën gërmadha… Ka pasur rrëshqitje të dheut dhe ura mund të rrëzohet”, ka shtuar tutje ai.
Agjencia për Mbrojtje Civile në Itali ka thënë se tërmeti ishte “i rëndë” dhe ka pasur raportime për dëme edhe në zonat malore. Në Facebook është shkruar se në malin Gran Sasso një pjesë e madhe e shkëmbit është shembur gjatë tërmetit.
“Kemi lajme për të lënduar dhe për kolapsime të ndërtesave”, ka thënë kreu i kësaj agjencie, Frabrizio Curcio.
Forcat e ushtrisë janë drejtuar menjëherë drejt një konvikti të një shkolle, ku është konstatuar mungesa e tre murgeshave dhe katër të moshuarve që ishin të ftuar. Ekipet e shpëtimit kanë nxjerrë gjallë një burrë nga rrënojat e një shtëpie të shkatërruar në qendrën historike të Amatrices. Në të njëjtën ndërtesë të shkatërruar ndodhen 6 persona të tjetër, për të cilët vijojnë kërkimet. Ende nuk dihet mbi fatin e tyre.
