Është mbyllur protesta e dytë ku kërkohet drejtësi për Jonada Avdian, 7-vjeçaren e cila humbi jetën nga goditja e një skafi në Himarë. Protestuesit të zemëruar nga mosreagimi i kryeministrit Edi Rama, kërkuan dorëheqjen e tij dhe të gjithë ministrave të kabinetit qeveritar.
Pas incidenteve në Ministrinë e Brendshme, protestuesit me pankarta dhe të shoqëruar nga fëmijët iu drejtuan Kryeministrisë. Nga godina dhe zyra e Kryeministrit Rama, e afërmja e Jonadës, pedagogia Ilirjana Kuçana telefonoi kryeministrin Edi Rama, live nga protesta, por ai nuk e hapi.
Më tej, ajo paralajmëroi se do të zhvillohet një peticion në gjithë Shqipërinë, ku do kërkohet largimi i ministrave Çuçi dhe Kumbaro.
“Nuk e hap telefonin, nuk është kryeministri i vendit. Por ne do të vazhdojmë drejtësi për Jonadën. Ne do të kërkojmë drejtësi në çdo institucion ndërkombëtar. Të dashur qytetarë ne do të ndërmarrim një peticion në gjithë Shqipërinë, duke i kërkuar kryeministrit Edi Rama të shkarkojë Çuçin dhe Kumbaron.”-tha ajo.
