Djegia e banesës e ka thelluar edhe më tej dramën e familjes Hoxha që jeton vetëm me të ardhurat prej shitjes së sherbelës dhe bimëve të tjera medicinale. Rabie Hoxha, 65 vjeç dhe i biri prej 20 ditësh e kalojnë natën jashtë në oborrin e shtëpisë së tyre të djegur në fshatin Kolonjë të Gjirokastrës. Banesa 1 katëshe që ishte e amortizuar prej vitesh u përfshi nga flakët e shkaktuara nga një furnelë gazi për gatim që ishte harruar e ndezur në njërën prej dy dhomave.
Vështirësitë e jetës nuk mbarojnë këtu për familjen Hoxha, pasi djali i Rabies vuan prej vitesh nga një formë kronike e hepatit dhe mjekohet vazhdimisht për ta mbajtur gjendjen të stabilizuar. Megjithëse i paaftë për punë ai shpenzon më shumë se 10 orë në ditë në shpatet e maleve përreth për të grumbulluar bimë që të sigurojnë jetesën.
Deri më tani ende nuk është ofruar një zgjidhje për strehimin e familjes Hoxha ose të jetë kryer ndonjë vlerësim i dëmit të shkaktuar nga zjarri por burime nga bashkia Gjirokastër bëjnë me dije se këshilli bashkiak pritet të miratojë në mbledhjen e radhës një fond mbështetjeje emergjente për të përballuar qeranë e një banese që gjithsesi do ta linte familjen Hoxha në situatë kritike pasi ata kanë humbur gjithçka prej zjarrit. Në zjarr thotë Rabia u dogjën edhe kujtimet, paratë, orenditë e veshjet.
Banesa një katëshe duhet rindërtuar para dimrit por ky vlerësim do të duhej të kryhej nga Emergjencat Kombëtare. Rastet e banesave të djegura aksidentalisht në qarkun e Gjirokastrës janë të paktën 6 gjatë vitit të fundit. Në dy prej rasteve përveç shkatërrimit të pronës zjarret kanë shkaktuar edhe viktima.
