Sot është dita e dytë që pronarët e mjeteve lundruese kanë dalë në protestën, kundër vendimit të drejtorit të Policisë, Gledis Nanos, për pezullimin e tyre. Ashtu sikur një ditë më parë ata kërkojnë që mos të paralizohen të gjithë fajin e disa pronarëve që mbanin skafet dhe mjetet e tjera lundruese pa leje. Disa prej tyre kanë dalë në protestë me dokumente në duar, ku tregojnë se kanë marrë leje, kanë kryer kontrollet e duhura dhe janë komfort ligjit. Një nga protestuesit tha se qeveria po e bënë këtë për propagandë, pasi edhe policët nuk po dinë si të veprojnë, por bien në kundërshtim. Ai theksoi më tutje se policia nuk iu jep asnjë sqarim se çfarë do të ndodh më tej por iu thonë se kanë marrë urdhër nga lart.
“Në radhë të parë ngushëllime familjes që i ka ndodhur tragjedia, kam 14 vite që punoj në Velipojë, veç hajrin na ka parë policia dhe jo sherrin, kemi shpëtuar dhjetra jetë njerëzish. Ne kërkojmë një përgjigje, ne jemi penalizuar, dhe përgjigja nga policia nuk vjen. Nuk ka asnjë vendim me shkresë, ‘jo kam marrë urdhër nga lart, jo se më ka thënë i madhi, jo se më ka thënë i vogli’. Ne paguajmë taksa, paguajmë tatime, edhe pse nuk na kanë dhënë asnjë shkresë ‘na thonë prit, prit, prit’. Asnjë incident nuk kemi pasur në këto 14 vite. Dikujt ia kemi dhënë edhe pa patentë, por asnjë incident nuk ka pasur. Ka raste që kemi shpëtuar qytetarë, sepse policia vetë nuk ka pasur skafe”, shprehet Alban Frroku, pronari i 4 mjeteve të ujit në Velipojë.
‘Mbas ngjarjes që ndodhi, jemi shumë të mërzitur, na vjen keq se jemi familjarë dhe vetë. Policia kufitare na tha që nuk mund ti nxjerrim më motorët në ujë, dhe kaq, ndaj ju jemi drejtuar edhe juve. Dikush i ka këto mjete edhe për të ngrënë bukë, dikush tjetër i ka për qejf. Dokumentet i kemi paguar në Durrës, kjo ka ndodhur dhe në një fatkeqësi që ka ndodhur më parë, por tashmë nuk gjejmë zgjidhje’, shprehet pronari i disa motorëve të ujit. Nga ky vendim janë penalizuar 3 subjekte dhe rreth 10 mjete vetëm në Velipojë.
