Tragjedia e Himarës, ku një 7-vjeçare humbi jetën si pasojë e goditjes së një skafi lundrues të drejtuar nga polici Arjan Tase, shërbeu si një këmbanë alarmi për sigurinë e pushuesve në plazhet shqiptare. Policia me urdhër të shefit të tyre, Gledis Nano, me një kamer nga pas që “show” i tyre të marrë përmasa më të mëdha ndaloi lundrimin e mjeteve në zonat bregdetare të preferuara nga pushuesit.
Por nuk kaluan pak orë, dhe në rrjetet sociale dhe media qarkulluan media sesi disa “të çmendur” pas “Jetskive” bënin manovra të rrezikshme shumë pranë kokave të pushuesve.
Por këto video janë përgënjeshtruar nga policia kufitare e Shëngjinit, e cila përmes një reagimi shprehet se mediat po nxisin qytetarët kundra tyre me filmimet e vjetra që publikon. Blutë e Shëngjinit theksojnë se pamjet në video nuk janë të këtij sezoni por të disa viteve më parë.
“Në lidhje me një video të publikuar në rrjetet sociale, në të cilën shfaqet një person, me një mjet lundrues “Jet ski”, në det, në Shëngjin, duke kryer manovra që rrezikojnë jetën e një qytetari që po notonte, ju informojmë se:
Pamjet që shfaqen në video nuk janë aktuale të këtij sezoni veror, por të disa viteve më parë. Aktualisht, në vendin që shfaqet në video, ndodhet një objekt i ndërtuar para disa viteve.
Nisur nga publikimet e fundit në portale, të cilat nuk janë pamje aktuale, por që u dërgohen me tendencë portaleve për publikim, me qëllim nxitjen e reagimit qytetar, Policia e Shtetit apelon për çdo portal dhe media vizive e të shkruar, që të mos publikojnë video ose lajme të pakonfirmuara, por të marrin informacion të saktë pranë strukturave përgjegjëse në Policinë e Shtetit.”-shkruan në njoftim policia kufitare e Shëngjinit.
