Pas tensioneve në veri të Kosovës, vjen dhe reagimi i Maqedonisë së Veriut. Ministri i Jashtëm i Maqedonisë së Veriut, Bujar Osmani shprehet se po i ndjek me vëmendje zhvillimet në Kosovë, ndërsa shprehet i lumtur që më në fund u ulën tensionet mes palëve.
Osmani komenton dhe vendimin e Kosovës për të shtyrë deri në shtator zbatimin e reciprocitetit ndaj Serbisë për çështjen e targave dhe dokumenteve,
“Ne po përcjellim situatën në veri të Kosovës me interes të madh, duke mirëpritur depërshkallëzimin. Ne inkurajojmë Kosovës dhe Serbinë në linjë me qëllimet e fqinjësisë së mirë dhe vlerave europiane që të ruajë atë që është arritur në besim të mirë, duke marrë në konsideratë kontekstin e brishtë gjeopolitik”.- tha Osmani.
Veriu i Kosovës u përfshi nga tensionet pasi qeveria e Kosovës paralajmëroi se duke nisur nga 1 gushti qytetarët serb që kanë makina me targa me akronime të qyteteve të Kosovës, që lëshohen nga Serbia, do të mund të riregjistrojnë makinat e tyre me targat RKS (Republika e Kosovës). Pas tensioneve dhe kërkesës së SHBA, Kurti vendosi shtyrjen e këtij vendimi.
